(Aruba) Conseho di Minister di acuerdo cu tur punto di Ministerio Publico, pa prohibi importacion ilegal di combustible

ORANJESTAD (AAN) – DIARIO a acerca Minister di Infrastructura, Medio Ambiente y Integracion, señor Benny Sevinger, relaciona cu e distribucion ilegal di gasoline rond di nos Isla y e hecho cu diferente persona ta keha cu e likido ta keda plama den na area. Un situacion cu a yega asina leu cu hasta Ministerio Publico a cay aden. E dignatario a duna di conoce cu gobierno a haya diferente reaccion, cu a yega na e diferente ministerionan, y Ministerio Publico hunto cu varios departamento, a tuma e problema aki for di diferente angulo.
Entre otro, cu tin botonan cu a zinc caba y cu a trece problema pa nos awanan di lama y e bida marino. Ademas, el a subraya cu trece productonan pa Aruba cu no ta regla cu tur e permisonan concerni ta un problema, y e falta di seguridad specificamente pa loke ta trata e productonan aki.
Fuera di esey, algun di e estacionnan di gasoline cu ta legal a cuminza reclama cu con por ta posible cu nan ta atene na tur e reglanan cu nan mester cumpli cune, pa eherce e negoshi aki y otronan ta hacie sin tene cuenta cu nada.
Minister Sevinger a menciona cu durante e ultimo simannan a sosode diferente incidente, unda cu algun boto a zinc y cu a trece e problema na luz di dia, y pesey instancianan manera, entre otro, Cuerpo Policial, Ministerio Publico Directie Scheepvaart, DTI, Ministerio di Infrastructura y Medio Ambiente, hunto cu Aruba Port Authority y LVV, a sinta wak e problema aki, cu e meta di yega na un solucion concreto.
Dentro di e proceso aki, Ministro di Infrastructura a haya un carta di Hofd Officier di Husticia, den cual e ta pone puntonan di accion pa Conseho di Minister tuma. “Nos a bay den Conseho di Minister tambe, y nos a bay di acuerdo cu tur e puntonan aki”, e dignatario a subraya.
Entre otro, a tuma e decision pa prohibi e importacion di e tipo di gasoline y diesel aki, for di Venezuela, for di entrante 5 di Augustus, durante tres luna, wardando riba un LV definitivo, y esaki ta via un landsbesluit.
E mandatario a splica cu asina por tuma medida di inmediato, y hopi di e importadornan no tin e vergunning necesario, locual ta concerni Minister di Husticia. Ministerio Publico ta sugeri pa APA bin cu reglanan mucho mas estricto pa loke ta trata botonan cu ta trece combustible na waf, y Minister de Meza hunto cu Douane cu ta cay bao di su cartera, Directie Scheepvaart cu ta cay bao Minister Otmar Oduber, hunto cu e Haven Mesteer mester tuma e medidanan necesario, y di otro banda Departamento di Economia mester prohibi pa trece e productonan menciona, y den e forma aki Aruba ta tuma su pasonan.
“Pa loke ta trata Ministerio di Medio Ambiente, nos ta esun cu ta monitor henter e situacion, pa cualkier daño cu wordo haci na nos medio ambiente, por wordo preveni”, e dignatario a subraya.
Minister Sevinger a agrega cu Brandweer ta hungando un rol importante den tur e investigacion y rapportnan cu mester wordo traha.
Ya caba tin un informe di Brandweer relaciona cu un lugar na Savaneta, unda cu nan ta bisa cu un explosion por sosode, of un candela por surgi, a raiz di e negoshi aki.
“Nos no tin otro forma di haci cu para esaki inmediatamente y tuma e cosnan den beslag, y boet e personanan cu ta haciendo e tipo di negoshi aki sin cu tin ningun clase di permiso, ni medidanan di seguridad pa haci esaki”, Minister Benny Sevinger a declara.
El a reitera, finalmente, cu Conseho di Minister a bay di acuerdo cu tur e puntonan di Ministerio Publico, y hunto cune e otro departamentonan lo sinta cu tur e instancianan concerni, pa bin cu recomendacionnan fiho, y pa decision di gobierno wordo ratifica, sea pa medio di cambio di ley of Landsbesluitnan cu tin cu bin, pa asina e publico sa kico por y kico no.

http://www.diario.aw