(Aruba) Ministerio Publico a tuma pa prome biaha gasolin Venezolano den beslag na cas di hende riba Diabierna

ORANJESTAD(AAN): Riba Diabierna 29 di Juli Cuerpo Policial di Aruba a descubri un almacen grandi di gasolin y fuel riba tereno di un cas den barrio di Simeon Antonio. Riba e tereno personanan tabata bezig ta pasa cantidadnan grandi di gasolin, cu aparentemente a worde importa desde Venezuela, for di drums pa jerrycans y containernan mas chikito. Den cooperacion estrecho cu Ministerio di Medio Ambiente, Bombero y Polis, Ministerio Publico a pone un fin na e overslag y almacenahe grandi aki di fuel. Riba ordo di fiscal a pone beslag riba 23.000 liter di gasolin. E mes anochi e gasolin aki a worde, cu ayudo di Brandweer, transporta pa refineria door di un compania specializa cu e fin di worde destrui.
E accion di Ministerio Publico y Polis a bin apenas algun ora despues di un decision den Conseho di ministronan tocante e maneho nobo y dinamico di e ‘overslag’ y almacenahe di fuel na cas di hende, como tambe e importacion di esaki via barconan y botonan di piscador desde Venezuela.
E overslag y almacenahe di fuel den barrionan di cas ta forma door di e cantidadnan grandi di gasolin y e forma di warda esaki den jerrycans y drums los, un situacion di peligro di bida, loke tabata e conclusion tambe den raport di Bombero, cu a worde traha despues di e descubrimento riba 20 di Juli 2011 ultimo di un almacenahe grandi di gasolin den containernan di 55 y 200 galon na un cas na Savaneta.
Pais Aruba, bao di cual ta cay Ministerio Publico y Cuerpo Policial di Aruba, ta trahando pa di 15 Augustus 2011 pa dilanti pone un fin na e manera actual di importa, warda y transporta gasolin desde Venezuela.
E fuel ta worde treci den barconan chikito y botonan di piscador desde Venezuela sin cu ta cumpli cu ningun precaucion di candela. Tambe ora di transportacion riba caminda pa ‘particuliernan’ y ora di warda e gasolin na casnan no ta cumpli cu reglanan pa preveni candela, y asina ta cu den mayoria di caso por papia di gran peligro pa salud publico y medio ambiente.
Ora descubri tipo di overslag y almacenahe grandi asina di fuel, e procedura cu lo worde sigui di awor pa dilanti, ta cu e lugar lo worde cera inmediatamente pa Minister a base di e asina yama ‘Hinderverordening’
Tur material y gasoline lo worde kita di e lugar y e gastonan lo ta pa e personanan envolvi. Tambe lo traha process-verbaal pa Ministerio Publico haya.
Pa warda y pasa fuel mester tin permisonan a base di Hinderverordening. Ta un hecho castigable ora un lugar ta warda y pasa gasoline sin tin permisonan y esey a base di articulo 16 di Hinderverordening. Alavez Ministerio Publico por actua a base di articulo 179a di Buki di Ley Penal.
E articulo aki ta pa proteha medio-ambiente y ta encera aspectonan penal di intencionalmente y contra Ley pone substancianan peligroso den tera of aire.

http://www.diario.aw