(Aruba) Prohibicion riba importacion, deposito y transportacion di gasolin y diesel illegal entrante 15 di augustus 2011

ORANJESTAD(AAN): Diabierna 29 di juli 2011 Conseho di Minister a tuma un decision tocante deposito di gasolin na casnan particular como tambe e importacion di gasoline via barconan di piscado for di Venezuela. Recientemente Brandweer a descubri un deposito cuantioso di gasolin den tankinan di 200 galon y tankinan di 55 galon na un cas na Savaneta. For di un raport di Brandweer a resulta cu pa e cantidad di gasoline, e manera di e deposito den jerry cans y drum, na e cas aki, ta papia di un situacion hopi peligroso. Ademas esaki ta forma un risico grandi pa nos medio ambiente.E conseho di Minister a yega na un acuerdo riba un procedura, cu den casonan asina lo wordo sigui. Despues di un deliberacion cu Ministerio Publico, KPA, Brandweer, Inspeccion di Medio Ambiente, DTI a yega na un decision cu den caso di depositonan grandi di gasolin na un establesimento y vivienda, mesora esaki lo wordo sera door di Minister, basa riba e ley di molester ambiental.
Tur material y e presencia di gasoline lo wordo kita y e gastonan ta core pa e persona of personanan responsabel. Tambe un proces-verbal lo wordo traha den nomber di Ministerio Publico.
Conseho di Minister a dicidi pa entrante 15 di augustus 2011 di limita e importacion y transportacion di gasolin.
Den estrecho relacion cu Ministerio Publico, Brandweer, Kustwacht, Douane, Directie Scheepvaart, Aruba Ports Authority, DTI, Directie Wetgeving en Juridische Zaken y Ministerio di Medio Ambiente, e minister encarga cu Medio Ambiente a presenta algun medida pa bay contra y hasta di prohibi e importacion di gasolin for di Venezuela, manera actualmente ta tumando luga cu e barconan di pesca sin reglanan di seguridad, entrante 15 di augustus 2011. Conseho di Minister a bay di acuerdo cu e pakete completo di medida cu Minister di medio Ambiente a introduci.
E decision, basa riba Ley di Ordenansa di Importacion y Exportacion, ta cu e importacion actual di gasolin via e barconan di pesca for di Venezuela, entrante 15 di augustus a wordo prohibi pa un periodo di tres luna door di Minister di Economia.
Den e periodo aki un decreto gubernamental lo wordo formula, cu lo contene un prohibicion definitivo di e importacion di gasolin Venezolano pa Aruba.
Aparte di esey a dicidi cu Brandweer basa riba Ley di Ordenansa di Brandweer, pa loke ta trata e transport di gasolin y diesel riba caminda y deposito riba tera, lo haya exigencianan di seguridad hopi estricto.
Aruba Ports Authority (APA) tambe lo introduci exigencianan parecido na e barconan di pesca cu ta transporta gasolin y diesel. Barconan cu ta transporta gasolin y diesel, pero cu no ta cumpli cu e exigencianan di seguridad, lo no wordo permiti pa drenta e wafnan di Aruba.
Nan tambe, entrante 15 di augustus 2011, lo no wordo permiti pa mara na nos waf y lo wordo debolbe pa Venezuela. Conseho di Minister ta di opinion, cu e Havenmeester, den e ley di Ordenansa di Waf, renoba tambe mester haya e autoridad pa pone regla den e transportacion y deposito di gasoline diesel.
Cu e medidadnan aki Conseho di Minister ta trata di pone un fin na e actual manera di importa, deposita y transporta gasolin y diesel illegaal cu ta un peliger pa salubridad publico y medio ambiente.

http://www.diario.aw

Los comentarios están cerrados.