(Aruba) Plan di estimulo economico di Gabinete Mike Eman dunando su frutonan

ORANJESTAD(AAN):– For di dia di instalacion di Gabinete Mike Eman, un di e prioridadnan tabata pa yuda pueblo di Aruba recupera nan poder di compra y pa asina Aruba garantisa crecemento economico di Aruba. “Awe nos por mira den relatonan di institutonan oficial manera Banco Central di Aruba cu plan di estimulo economico di Gobierno di Aruba ta logrando su meta di trece e economia di Aruba bek ariba pia,” segun e titular di Finanza Publico ing. Mike de Meza.
Den nan comunicado Banco Central di Aruba ta mustra claramente cu indicadornan economico ta duna señalnan di un mehoransa continuo. “Ora cu nos a tuma rienda over di Aruba, nos tabata meymey di un recesion cu un contraccion economico di 14%, cu ta casi tres biaha mas hopi cu e caida economico cu Hulanda a haya su mes aden.”

E titular ta sigui splica cu e desempleo tabata pasa un 10%, y cu inversionnan priva tabata hopi abou y e intencionnan pa inverti tabata hopi zwak. Gobierno a prepara un plan di inversion di casi 700 miyon di florin cu ta encera renobacion di nos infrastructura, centronan di ciudad y barionan.

Awe na 2011 nos por mira cu Aruba ta riba un bon direccion unda cu inversionnan ta wordo haci no solamente door di Gobierno pero tambe pa e sector priva. Esaki automaticamente ta yuda cu awe nos por papia di un desempleo cu ta bahando.

“Na aña 2009 e desempleo na Aruba a yega un piek di 10%, unda cu awe nos por constata cu desempleo a baha y ta sigui baha”, minister De Meza a enfatisa. Asina por mira tambe basa ariba e cifranan presenta pa nos oficina di estadistica cu den e prome kwartaal di aña 2011 Aruba a importa 535 miyon florin cu ta indica un aumento di 30.8%.

Cu e cifranan aki nos por conclui cu nos economia ta mehorando substancialmente. “Aruba ta sigur ariba un bon caminda”, segun minister di Finanza. “Nos lo sigui traha pa yega na solucionnan structural.” Tambe e titular a papia di un crecemento substancial den nos sector turistico cu ta alrededor di 6%.

Hunto cu tur esaki Gabinete Mike Eman ta trahando ariba e cambio di tecnologia pa un tecnologia di energia alternativo. Gobierno como alivio pa e pueblo di Aruba ta trahando riba e proyectonan pa cambia WEB Aruba NV di e uzo di fuel oil pa e uzo di gas pa aña 2012.

Ademas lo redobla e capacidad di molinanan di biento. E maneho di energia di Gabinete Mike Eman tin como fin di reduci e gastonan di produccion di awa y coriente. “Esaki lo resulta den un reduccion den gastonan di operacion di compania, mehoracion di poder di compra di nos ciudadanonan y tambe un impulso positivo pa nos economia”, minister De Meza a conclui.

http://www.diario.aw

Los comentarios están cerrados.