Grupo grandi trahando pa regula estrictamente, transportacion y desembarke combustible na waf Barcadera

ORANJESTAD (AAN) – Durante un entrevista cu director di Aruba Port Authority, sr. Alfonso Boekhoudt, DIARIO a puntre tocante e tema cu a trece basta polemica despues cu a bati voz di alarma, relaciona cu e combustible cu ta bin for di Venezuela y ta drenta via waf di Barcadera, bao condicionnan di halto grado di inseguridad di embarke, transportacion y desembarke.
“ Ta asina cu via nos waf semper caba materialnan peligroso ta worde transporta, sea pa nos Isla mes of pa pasa via nos isla bay afo. E no ta algo cu awor diripiente tin material cu por forma cierto peligro, ta worde transporta. Mester pone na cla cu den waf mester percura pa tin procedurenan pa maneha e carganan di e forma aki, cu ta peligroso”, director di APA acentua.
El a agrega cu e reglanan internacional cu ta existi cu ta deal cu con pa transporta materialnan peligroso, no ta aplicable pa e tipo di botonan cu ta transporta e combustible.
“ Pa tal motibo nos mester a tuma un bon analisis di e situacion, con e ta pasa, kico ta realmente, tur e problemanan cu nos tin cu e forma con e ta worde transporta, kico ta e peligronan cu e ta trece pa cual tur grupo di hende, y con ta e forma apto cu nos ta kere cu e mester worde transporta y almacena, na Aruba”, sr. Boekhoudt a añadi.

Director di APA a splica cu den e cuadro aki tin conversacionnan ta andando, y muy pronto ta bay bin cu regulacionnan estricto pa esaki, na un forma cu den waf por deal cu tur e riesgonan, of alomenos pa percura pa tene e riesgonan bao di control.
“ Kiermen, e ta encera cu nos ta sinta na mesa cu un grupo grandi di hende, y den e dianan aki nos ta bay reuni cu nan pa bin cu e procedurenan con nos mester maneha e tipo di materialmente peligroso aki, den nos waf di Barcadera, pa asina asegura cu e forma con e ta bay pasa ta safe!”, sr. Alfonso Boekhoudt a señala.
“ No carga ningun duda cu e forma con esaki ta tumando lugar aworaki, no por tin aprobacion di ningun instancia”, Boekhoudt a remarca.
“ Nos a wak caba cu bida di hende a worde poni na peligro, y esaki ta algo cu nos no ta bay permiti pa sigui dura, y mester tene na cuenta cu esnan cu ta importa e combustible, mester sali for di e punto di bista cu ta bin reglanan cu nan mester bay atene na dje, y cu ta pone cu nan no por bin cune, manera nan ta haciendo.
Pero ta mucho prematuro aworaki pa bisa ki tipo di reglanan ta bay bin, pasobra e discusionnan ta tumando lugar na e momentonan aki, pero djis tene na cuenta cu loke ta sosodiendo na e forma aki, no por sigui tuma lugar den futuro”, segun director di APA.

http://www.diario.aw

Los comentarios están cerrados.