APA: Pronto lo bin cu medidanan estricto riba transportacion y maneho riba waf, di combustible importa for di Venezuela

Tocante e lote di combustible cu ta wordo importa na Aruba for di Venezuela, y cu tanto su transportacion riba lama como ora e carga subi riba waf di Barcadera, ta sosode bao condicionnan di inseguridad, nos a combersa cu director di APA, Alfonso Boekhoudt.“ Ta asina cu via nos waf semper caba materialnan peligroso ta wordo transporta, sea pa nos Isla mes of pa pasa via nos isla bay afo. E no ta algo cu awor diripiente tin material cu por forma cierto peligro, ta wordo transporta”, Boekhoudt a declara. Si ta asina cu e ta conciente cu mester bin cu procedurenan pa handle e carganan peligroso aki, pa evita of baha e riesgonan, y di hecho, ela comenta, bida di hende a wordo poni na peligro caba. El a duna di conoce cu e reglanan internacional cu ta existi cu ta deal cu transportacion di materialnan peligroso, no ta aplicable pa e tipo di botonan cu ta bin cu e combustible. “ Nos mester a tuma un bon analisis di e situacion, con e ta pasa, kico ta realmente, tur e problemanan cu nos tin cu e forma con e ta wordo transporta, kico ta e peligronan cu e ta trece pa cual tur grupo di hende, y con ta e forma apto cu nos ta kere cu e mester wordo transporta y almacena, na Aruba”, ela expresa. Tin combersacionnan ta andando pa muy pronto establece reglanan estricto pa percura cu den waf por deal cu tur e riesgonan, of alomenos tene e riesgonan controla. “Nos ta sinta na mesa cu un grupo grandi di hende, y den e dianan aki nos ta bolbe sinta cu nan pa bin cu e procedurenan con nos mester pa maneha e tipo di materialmente peligroso aki, den nos waf di Barcadera yt asegura cu e forma con e ta bay pasa ta safe!Alfonso Boekhoudt a bisa. “ No carga ningun duda cu e forma con esaki ta tumando lugar aworaki, no por tin aprobacion di ningun instancia”, ela remarca. E ta haya mucho prematuro aworaki pa bisa ki tipo di reglanan ta bay bin, pasobra e discusionnan ta tumando lugar na e momentonan aki, “pero djis tene na cuenta cu loke ta sosodiendo na e forma aki, no por sigui sosode den futuro”, director di APA a remarca.

http://www.24ora.com

Los comentarios están cerrados.