(Aruba) Panorama turistico ta mustra positivo

ORANJESTAD(AAN)– Den e relato mensual di luna di mei di Banco Central por mira claramente cu e instancia aki ta mirando futuro cu wowonan positivo. Den e relato por mira claramente cu nan ta indica cu tin un muestra di un crecimento continuo, algo cu sigur ta positivo pa henter nos comunidad. Ta pone enfasis riba e resultadonan positivo den turismo, algo di cual Minister di Turismo, Transporte y Labor, Otmar Oduber ta sumamente satisfecho. Banco Central ta indica cu den luna di mei turismo a aumenta cu 1,5% mientras cu den e promer 6 lunanan di 2011 turismo stay over a crece cu 5.9% (24,105 bishitantenan mas) compara cu e mesun periodo di 2010. Nan ta mustra cu e resultado positivo aki ta debi danki na aumentonan significativo di turismo for di Venezuela y Colombia cu a crece cu 38,5 y 30,8% respectivamente den e periodo di januari pa juni.
E cifranan aki ta un refleho di e maneho cu Minister Oduber a bin ta hibando, esta di purba diversifica nos mercadonan turistico y no concentra solamente riba Merca. El a expresa na diferente ocasion cu e kier logra reduci e dependencia grandi cu Aruba tin riba e mercado Mericano (cual na e momentonan aki ta rond di 62% di e total di nos bishitantenan) y purba crece den otro mercadonan existente y logra yega na mercadonan nobo.
Si no tabata pa e maneho actual e cifranan posiblemente lo tabata otro mirando cu den luna di mei e total di bishitantenan for di Merca a cay cu 1.1%, esaki debi na e situacion cu e pais aki ta pasando aden. Esaki ta haya mas forza na e momentonan aki caminda ta ser papia di un posibel recesion un biaha mas cu lo por afecta Merca y cual lo por tin consecuencianan pa nos isla.
Otro punto cu ta importante pa resalta di e relato di Banco Central ta cu nan ta menciona cu den luna di juni e total di bishitantenan a aumenta remarcablemente cu un total di 13.1%. Esaki manera Minister Oduber mes a yega di bisa, como tambe ATA S.G. ta hopi positivo, pasobra e ta un crecimento record den un luna cu pa definicion ta uno hopi slow.
E aña aki a logra yega cifranan record cu pa mas di 10 aña no a wordo logra. Y aki un biaha mas por bisa cu a logra esaki danki na e regionnan di Sur y Centro America, mientras cu e luna aki Merca si a mustra un crecimento di 4.5%.
Den e proximo lunanan di e temporada slow tin diferente actividadnan riba schedule cu lo atrae diferente bishitantenan, manera ta e caso di Aruba Music Explotion, cu ta enfoca hopi riba e mercado Latino, specialmente e Venezolano, caminda cu ya caba tin compromisonan di e dos di e tour operators mas grandi di Venezuela pa bin cu 13 charter, cu ta representa alrededor di 1600 turista adicional, banda di esnan cu ta bin den e vuelonan regular. Tambe tin e Sea Jazz Festival y Aruba In Style cu ta priminti di bira eventonan grandi pa nos isla.
Teniendo na cuenta e diferente actividadnan aki por bisa cu e panorama turistico ta mustra positivo y cu no solamente lo yega na e meta fiha di crecimento turistico di 3% den 2011, sino cu lo surpasa esaki tambe.

http://www.diario.aw

Los comentarios están cerrados.