Aruba a subi di puesto 8 pa 9 na number 3 como destino turistico prefera pa e Venezolanonan

Ministro di Turismo Otmar Oduber a haci un viahe masha probechoso na Venezuela, caminda ela reuni cu Embahador di Hulanda na Caracas, pa agiliza diferente proyecto cu tin conhuntamente pa desaroya. Tambe ela reuni cu autoridadnan di Aeronautica Civil ayanan, previamente na e vuelonan cu Insel Air Aruba ta bay inicia pronto. Nan a combersa tocante vuelonan charter, pa evita locual a sosode na Corsow, cu mester a cancela e vuelonan poco dia pasa, y cu por cierto, lo reanuda e siman aki.

Ministro Oduber a bisa na e autoridadnan di Aeronautica Civil Venezolano, cu definitivamente nan cooperacion ta sumamente importante den e proceso aki cu ta bay cuminza dentro di poco. Ela a agrega cu Aruba a haya hopi atencion di e prensa Venezolano, locual ta vital tambe, pasobra aworaki aki Aruba ta ocupando e di tres lugar den e destinacionnan prefera pa e Venezolanonan. Esun cu ta na prome lugar ta Estados Unidos, specialmente Orlando y e di dos ta Spanja. Ministro di Turismo ta hopi contento cu e logro aki, mirando cu na momento cu ela asumi su cargo di Ministro di turismo, Aruba a cay na puesto 8 pa 9 den e preferencia di e Venezolanonan cu ta viaha, y awor ela subi te e di tres lugar, locual ta refleha su mes tambe den e cifranan cu gobierno tin. E informacion aki Ministro di Turismo a comparti awe mainta den e conferencia di prensa di tur siman, cu gobierno.

http://www.24ora.com

Los comentarios están cerrados.