Juan David su “principio” lo costa Aruba 6.5 miyon Florin!

ORANJESTAD(AAN)Den ultimo dianan Juan David a sinta tras di Cortina y a cuminsa lobby contra e decision di Minister Dowers tocante e Prefabricated Buildings pa remplaza e trailernan y tambe crea un skol nobo na Dakota. Tur e decision, segun Juan David ta basa riba principio y no riba su envidia di Minister Dowers. No ta un secreto cu Juan David tabata basta critico riba Minister Dowers y esaki ta trese cune e unico conclusion possible, cu ta envidia tabata forze haci e criticanan! Artur Dowers ta mucho mas politico cune, y mucho mas honesto tambe!
Loke Juan David mester tene bon na cuenta y tambe e tiki parlamentarionan cu ta para cune ta cu Aruba ta pagando hopi placa pa luna pa huurnan innecesario. Nan funcion principal como parlamentario ta pa analisa y dicidi riba maneho di gobierno teniendo bon na cuenta e bienestar general di pueblo di Aruba. Falta di principio ta ora bo bisa un persona of empresa danki pa bo idea pa un solucion rapido, pa bo investigacion, pa tur e tempo y placa cu bo a hinca aden, pero ban sake pa destaho publico pa otronan (di partido AVP?) haya chance di apodera di e proyecto aki. Mi por menciona e nombernan, y mi ta bay hacie tambe (na su debido tempo!)
Pa awor, djis pensa riba lo siguiente; pa bo bai awor un destaho publico lo dura, si tur cos bay bon y no tin demora, dos aña! Esaki ta dos aña mas pa paga huur di Afls. 270,000.00 pa luna o sea Afls. 6,500.000.00 den dos aña. Ya un tercera parti di e inversion pa propiedad propio lo a ser paga caba.Tambe tene na cuenta cu no ta principio, sino capricho, lo causa pa no tin un skol na Dakota cla pa proximo aña escolar. Juan David sa e diferencia entre capricho y principio? Mi ta duda!
Sesenta y tres local nobo pa Aruba, full ekipa, cu airco, bunita, moderno y rapido. Esaki por ta un etapa nobo pa nos educacion. Un plan pa upgrade tur nos clasnan na nivel internacional pa duna nos yiunan un ambiente mas adecuado pa nan educacion. Pero NO, e “principio” di Juan David no ta permitie!
Lo ta bon pa Juan David duna un splicasion amplio riba kico su principionan ta basa. Pasobra un principio mas halto cu e bienestar di educacion y salud no ta existi! Tambe si tur cos den e proceso a bay segun ley, cua ta e problema di Juan David? E tin un faboritismo cu e kier demostra na dos miembro di partido cu ta loco pa haya e proyecto despues cu tur e trabao a ser haci y tur e calculonan ta cla, y e financiamento tambe? Si nos ta bay papia di “friends and family”, ta ey e cabuya ta preta!
Awor si mira esaki bon, e Capricho di Juan David pa blokea un proyecto asina sano por sosode solamente riba e custia di e educacion di muchanan cu tin mester di localnan y un skol nobo sin tardamento. Ta 400 mucha lo no tin clas pa sinta den dje. Anto kico Juan David lo propone, pone 15 trailer temporal mas mientras tanto? Ta su capricho y no principio ta obligue dicidi riba un bon proyecto y inventa excusanan pa causa su tardanza y ehecucion.
Gobierno ta pagando actualmente Afls. 270,000.00 pa luna djis pa huur un trailer. Si JEM Industrial Services N.V. a propone pa paga mesun cantidad, reemplaza e trailernan pa structuranan nobo y permanente, sin cu e costa Gobierno mas placa, sin haci e prome pago te ora tur cos ta entrega y sin cu gobierno mester sali busca financiamento., cua ta e problema? Unda Juan David su Principio ta drenta den wega?
Esaki no ta e prome muchachada di Juan David, pero teniendo na cuenta cu ta futuro di estudiantenan ta den wega, mester supone cu e Ministernan lo mester sinta na mesa cu parlamentarionan pa forza un decision na fabor di un tremendo proyecto?
Loke ta haci un politico grandi ta ora e mira un debate riba un tema y bin padilanti y bisa “ mi no ta comparti e opinion pero ban sinta discuti esaki pa mi por compronde mihor”.
(Nota di Jossy M. Mansur: “sinembargo, no perde for di bista cu burico ta keda burico y ningun principio por cambia esey.” Y laga Juan David tume con cu e kier, pasobra e ta provocando un guera cu e no tin ningun posibilidad di gana. Mi por garantiza esey di antemano!)

Jossy Elie Mansur

Los comentarios están cerrados.