(Aruba) Presidente Chavez ta den pleno recuperacion di su salud!

ORANJESTAD (AAN) – DIARIO a entrevista e Consul di e Republica
Bolivariana di Venezuela, señor Jesus Javier Fuenmayor, tocante e
condicion actual di salud di Presidente Hugo Chavez Frias, ken manera ta conoci aworaki ta na Cuba, pa ricibi radioterpia. Importante ta cu prome cu tur cos, mi mester haci eco di e declaracionnan cu e mesun presidente Hugo Chavez Frias, y nos Minister di Relacionnan Exterior, Nicolas Maduro, a realiza.
Presidente a splica claramente cu e ta posee un malesa, cu na Habana a wordo practica algun operacion cual a duna algun resultado cu a amerita di varios fase di curacion”, Consul Fuenmayor a bisa.
El a agrega cu e di dos etapa cu ta tumando lugar na Habana, Cuba, a drenta na vigor y por a mira Presidente Chavez comunica cu e pais via telefon, twitter, y den television mes por a mira imagen di dje direct, comunicando cu tur su facultadnan como Presidente Constitucional di Venezuela.
“ Su salud nos por mira cu ta den franca mehoria, y manera e mes ta ripiti ‘nos lo biba y nos lo vence’ cual ta e lema y esfuerzo cu e Presidente aworaki, ta empuha cu hopi forza, riba su enfermedad.
“ Nos ta sinti contento y ta gradici Dios, pa e recuperacion di e Presidente, cu e mes a manifesta den e progreso di su curacion, cu ta beneficioso y exitoso”, e consul a declara. E diplomatico a acentua cu e ta sigui spera cu e tratamento cu Presidente Chavez ta hayando wordo cumpli na cabalidad, pa e Venezolanonan tin presidente pa rato largo ainda.
“ Esey ta e speranza, e fe cu nos como Venezolano tin, y riba tur cos ta e intencion pleno cu un Presidente cu ta duna cu esfuerzo pa su pueblo, cu ta sinti y biba tur dia cu e clamor di e hendenan cu ta bise ‘recupera bo Presidente, nos tin mester di bo na Venezuela, nos mester e revolucion Bolivariano’ ta e elemento principal, ta e bandera principal, pa Presidente Chavez muy pronto bin back cu nos na Venezuela, plenamente recupera y manera el a haci semper, eherciendo su presidencia den plenitud di su facultadnan”, Fuenmayor a conclui.

http://www.diario.aw

Los comentarios están cerrados.