Gasoline y diesel ta drenta Aruba for di Venezuela, cu falta total di seguridad!

ORANJESTAD (AAN) – DIARIO a acerca señor Edward de Cuba, Comandante di Cuerpo di Bombero Aruba, tocante e barinan di gasoline y diesel cu ta drentando Aruba for di Venezuela, y cu ta drenta waf na Barcadera, na un manera hopi insigur.
De Cuba a duna di conoce cu na cuminzamento di siman, a cay na atencion di Brandweer, entre otro via e haven meester sr. Beaujon, cu a atende nan riba e situacion aki, y por a constata cu enberdad riba e waf di Barcadera tin practicanan basta  insigur ta tumando lugar.
El a duna di conoce cu hopi container y bari di gasoline ta worde treci for di Venezuela, y cu e maneho di e producto ta hopi insigur, for di e transportacion di e producto te e handling pa subi nan riba waf, ademas di e sistema pa saca e barinan for di waf.
Comandante sr. de Cuba a subraya cu mester bin cu reglanan, no solamente for di Cuerpo di Bombero pero pa cumpli cu e leynan internacional, cu ta worde kibra door di e forma insigur cu esaki ta sosode.
Rond di esaki tin un asunto serio tambe cu sr. de Cuba a haya tende, y ta cu den e vecindario tin casnan di famia unda cu tin deposito y cu nan ta cumpra e producto aki tambe, locual ta forma un peligro hopi grandi no solamente pa bomberonan, ora nan bay atende un candela, pero tambe pa e otro habitantenan di e bario y pa e famianan mes cu tin deposito.
Señor de Cuba a menciona cu el a haci un palabracion caba cu sr. Beaujon, di Directie Scheepsvaart, cu Cuerpo di Bombero por haci un inspeccion den e sitio, pa wak unda tin lugar por sirbi pa almacena e producto aki, na un manera safe.
Sr. Beaujon a asegura cu no tin nada asina ainda y cu mester bay traha riba reglanan di seguridad pa e transportacion di e gasoline aki, y Brandweer a drenta den contacto cu polis caba y ta buscando contacto tambe cu DTI, mientras cu departamento di prevencion di Bombero mes ta na haltura di e situacion y ta bay cuminza pasa rond, na e diferente lugarnan unda ta conoci cu tin e tipo di depositonan aki, pa wak si nan ta cumpliendo cu ley, por ehemplo e pompnan di gasoline cu mester atene na reglanan basta estricto pa nan por almacena y reparti gasoline, y un cas of negoshi cu tambe ta haci esaki igualmente mester cumpli cu e mesun reglanan.
De Cuba a agrega cu segun e permiso cu ta worde otorga pa den un cas of negoshi por tin gasoline almacena den un schuur, e ta pa un maximo di cinco gallon.
Esey kiermen tambe cu mester tin un “jerry can” den e lugar, marca riba dje cu tin gasoline, ya cu nan ta traha, specialmente pa gasoline, di un plastic cu no ta corosivo, y cu no ta carga mas cu 5 galon cu ta e cantidad maximo permiti pa uso domestico of priva, y mester tine den un area hopi bon ventila, ma no den un sala of camber.
Comandante sr. de Cuba a subraya cu autoridad di Cuerpo di Bombero ta limita, y pesey nan ta bay amplie cu autoridad policial y DTI, y nan ta purbando pa haya e instancia cu ta atende cu medio ambiente, pa worde envolvi tambe y asina trece acerca mas dienst cu hunto por tin mas autoridad pa actua.
Cuerpo di Bombero a haya informacion cu tin un cas na Savaneta, unda tin hopi bari di gasoline warda, y ayera merdia nan departamento di inspeccion, hunto cu polis, a acerca e doño pa splike tocante tur e leynan cu e ta kibrando, y pa mira con por pone un paro na e practica cu ta tumando lugar den e cas concerni.
Comandante de Cuba por a compronde cu e gasoline cu tin almacena tog ta legal, pasobra e persona ta paga su impuesto y tur loke e tin cu paga relaciona cu e posesion di e producto.

http://www.diario.aw

Los comentarios están cerrados.