Aeropuerto di Aruba ta sigui crece

ORANJESTAD(AAN): Gobierno kier haci bon uso di e mercado di aviacion general. Esey ta e motibo tambe cu Hunta di Comisario di Triple A a duna su aprobacion pa un inversion inicial di 18 miyon Florin pa un proyecto pa e seccion di airport aki. Esaki ta encera ademas di e edificio, mehoracion di e pista tambe. Tur e splicacion a worde duna ayera mainta durante develo di e borchi di e proyecto cu a conta cu presencia di Prome Minister Mike Eman y gerencia di aeropuerto. Minister Oduber mes ta den exterior. Minister Oduber, Gobierno, hunto cu Triple A tin motibo y hustificacion suficiente pa probecha di e mercado di Aviacion General cu, segun evaluacionnan haci, lo sigui crece so.

E mainta aki despues cu e borchi a worde devela door di trahadonan di Van Kessel den presencia di Minister Presidente y gerencia di aeropuerto, CEO di Triple A Peter Steinmetz a splica pakico a dicidi pa ampliacion di e area di aviacion general y mehoracion di e pista di e area aki.
“E area zuid di aeropuerto pa hopi tempo tabata un mucha “ongeschoold” te ora cu nos a cuminsa desaroya esaki na 2004.2005,” Steinmetz a cuminsa pa splica. El a agrega cu e prome proyecto di e area aki cu a keda entrega ta e facilidad chikito caminda awor ta ricibi e pasaheronan. Despues di e inicio chikito, a constata cu mester drecha y amplia e servicio cu ta worde duna, comokiera mas cliente tabata bin acerca.
E demanda tabata sigui crece, caminda cu den periodonan “piek”, e espacio a demostra di no tabata suficiente mas, y no por atende den forma adecuado cu tur e navenan aereo cu tabata yega. Pero prome cu por a yega na aprobacion di e plannan di ampliacion, a cuminsa haci evaluacionnan interno y cu ayudo di expertonan, a mira ki beneficio e lo por tin pa Aruba y con grandi e demanda lo por ta.
E pronosticonan tabata cu, pa 2026, e negoshi di transporte den avionnan chikito lo ta mas cu duplica (esta den “private and business jet”). “E calculo e ora ta nifica un crecemento di 4.5% pa aña y cu e cifra aki, mester pensa den ampliacion di e facilidad actual pa ricibi e pasaheronan y “apron”. Steinmetz a señala. E ta un proyecto grandi cu ta nifica un inversion di 18 miyon Florin den su prome parti. Pero tambe ta un proyecto cu lo tuma tempo, ya cu awor apenas nan ta den fase 1A.
Prome mester a dedica atencion na e infrastructura necesario, cambio den e sistema di coriente, awa, y facilidad pa duna combustibel na e navenan, seguridad, etc. “Parti di e prome fase ta construccion di dos hangar cu lo ta propiedad di aeropuerto y lo huur esakinan,” Steinmetz a duna di conoce.
Cu orguyo el a anuncia cu ya caba tin huur pa e dos hangarnan, door di Tiara Air y Oduber Aviation. “No por otro tampoco, pasobra nos ta sacando nan di nan actual hangar,” e director a agrega.
Steinmetz tabata contento di por bisa cu a logra yega na e plannan aki, cu cooperacion di tur esnan afecta manera Oduber Aviation, Tiara Air, Valero y esnan cu ta biba den becindario tambe. E proyecto lo core te meymey di 2012, cu ta inclui 2 hangar, reforsa e actual plataforma (ya cu e actual ta basa riba navenan aereo mas liviano cu e 737-nan).
Esaki lo sosode den fase 1B. E ta encera tambe mehoracion di e seguridad, caminda lo duplica e exit di e plataforma pa runway, cu awor ta un so tin. E ta un problema pa entrada y salida di avionnan ora cu nan ta yega tras di otro of hunto.
Cu tur e cambionan aki ta bay atrae clientenan di entrada mas halto, ta duna un producto di calidad. Pero mas cu tur cos, el a bisa, ta bay mehora nomber di Aruba den e segmento di esnan cu entrada halto, cu hopi biaha ta trata di evita paisnan caminda tin problemanan politico. Naturalmente e ta trece cune un crecemento.
Poniendo tur e proyectonan aki hunto, cu lo ta cla pa 2014, e inversion total ta yega rond di 50 miyon Florin cu lo worde financia completamente door di Triple A.

http://www.diario.aw

Los comentarios están cerrados.