Gasolin di Contrabando cu ta sali di Venezuela birando un peliger grandi pa waf di Aruba

ORANJESTAD(AAN): Contrabando di gasolin cu ta sali ilegalmente for di Venezuela y drenta nos isla den forma legal ta birando un peliger hopi grandi. Esnan trahando riba tereno di waf na Barcadera ta sinti cu nan bida ta na peliger. E forma cu ta transporta e gasolin a cuminsa bira algo masha cuestionable.
E ta negoshi kizas pero esaki no ta e forma adecuado pa atende cu cosnan asina. Autoridad local mester cuminsa pone hopi atencion pa e situacion cu tin. E botonan aki no ta tankers specializa den e transporte di gasolin.
Nan ta djis pone riba 20 bari grandi full cu gasolin den un embarcacion chikito y sali bin Aruba. Ta warda ora cu guarda costa Venezolano pasa bay pariba of pabao y asina nan ta sali direccion nort pa Aruba. Gran parti di e embarcacionnan aki ta sali for di Puerto Escondido caminda ta carga e barinan yena cu gasolin. Tur cos ta draai rond di e prijs cu ta cumpra e gasolin aki.

E prijs ta hopi mas abao pero ta pa esnan biba na Venezuela so usa. Aki ta caminda e corupcion ta cuminsa. Ta cumpra e gasolin na prijs local Venezolano y sake for di pais. Ta drenta cune na Aruba y paga su impuestonan y asina mes nan ta bende na prijs hopi mas abao cu e pompnan normal na Aruba. Parce cu nan ta spaar como 40% si compara esaki cu e gasolin cumpra na Aruba.
For di bon fuente tin informacion cu e barinan di gasolin ra worde cumpra na Venezuela pa menos cu 10 Dollar. Ta paga pa bari grandi 138 Florin na impuesto y bende na 400 Florin cu localnan.
E otro barinan mas chikito ta paga 80 Florin na impuesto y esaki ta worde bendi na 310 Florin of algo menos pa bari. E por ta atractivo pero con a para cu e seguridad?
Ningun di e botonan tin un aparato di paga candela.
Nan ta yega mara den waf y cualkier chispa ayo esnan riba waf. Tin mas boto mara rond. Ken ta responsable pa e cos aki? Directie Scheepsvaart parce ta na soño. Of nan tambe ta cumpra e gasolin aki? Pesey nan no ta actua riba e aspecto di seguridad?
Directie Scheepsvaart ta bentando e problema den scochi di gobierno pa minister tuma un decision. Ta kico ta warda anto? Cualkier ciego ta mira cu e procedura aki ta completamente peligroso. Te hasta bomberonan a bay mira e situacion y nan no a haci trabao riba dje. Diamars so a yega parce riba 50 tanki of bari yena cu gasolin.
Diamars atardi lat polis y bomberonan a worde manda na un cas cerca di e veld di San Luis na Savaneta. A drenta informacion deposito di gasolin. A resulta cu tabata tin un compartimento cu masha hopi bari di gasolin.
Parce cu e forma cu esaki tabata warda no ta esun adecuado. A keda di bay back mainta cu e departamento di prevencion di cuerpo di bombero pa mira e situacion. Aki por mira cu keto bay e cantidad di gasolin procedente di Venezuela ta birando un problema serio.

http://www.diario.aw

Los comentarios están cerrados.