(Aruba) Mayornan tin derecho riba 550 Florin pa yiu cu ta bay Colegio Arubano

ORANJESTAD (AAN) – Na edificio di ex- Schakel School na Noord, Minister Presidente a tene un conferencia di prensa, hunto cu Minister di Asunto Social sra. Michelle Hooyboer- Winklaar, y tambe tabata presente e director nobo di Departamento di Asunto Social, sra. Lenny Geervliet. E dos aspectonan principal di e rueda di prensa tabata e ayudo social cu gobierno ta brinda e mayornan di entrada mas abao, y
esnan cu ta depende di bijstand, den e temporada previo na apertura di aña escolar, y e introduccion di sra. Geervliet como director nobo di D.A.S.

Tambe a wordo anuncia pa Prome Minister cu e edificio unda e conferencia di prensa a tuma lugar, lo bira, temporalmente, e sede di D.A.S na Noord, tanten cu nan haya un edificio nobo.
Premier Eman a cuminza cu e comentario cu den comunidad ta wordo bisa cu tin hopi necesidad den nos pais, entre otro, mayornan tin problema pa cumpra buki pa nan yiunan cu ta bay drenta Colegio Arubano.
E dignatario a acentua cu hopi famia no ta na haltura cu apesar cu nan tin un entrada mensual, basta e no ta mas halto cu 30 mil florin pa aña, nan tin derecho pa cada mucha di haya un asistencia di 550 florin pa yuda nan cu buki y demas tools cu nan mester pa drenta Colegio Arubano. El a agrega cu naturalmente, mayornan cu ta depende di bijstand y cu tin yiu ta bay Colegio, tambe tin derecho riba e mesun suma aki.
Prome Minister a indica cu hopi famia no sa y ta keda bao di e 550 florin aki, locual no ta e intencion. Intencion ta pa tur cu mester haci uso di e placa aki.
E dignatario a subraya cu aña pasa nan no a haci uso completamente di e suma, posiblemente pasobra e mayornan concerni no tabata na haltura di esaki.
Premier Eman a añadi cu tin tambe 120 florin pa cada hoben, por ehemplo di mama soltero, pa yuda cu paña, keds, etc., pa school. Riba esaki tin 120 florin pa paga schoolgeld, tambe pa e yiunan di famianan cu ta depende di bijstand.
Tur esaki ta banda di e 200 florin extra cu gobierno a pone riba e bijstand como “schoolkindertoeslage”, cu si ta un suma mensual y no solamente e luna cu e mucha ta bay drenta un aña escolar nobo. Esaki ta un suma permanente, e dignatario a remarca. E sumanan aki ta adicional na e aumento di 25% riba bijstand cu gobierno a introduci.
Prome Minister a bisa cu e ta hopi contento cu banda di gobierno tin hopi fundacion cu den e periodo di apertura di aña escolar, ta tuma iniciativa pa busca tas, paña, etc., pa famianan di menos recurso y cu mester tin un suma pa cumpra e articulonan escolar, specialmente esnan cu tin mas cu un yiu ta bay school.
Esaki ta algo hopi importante, y Premier Eman a gradici su colega Minister di Asunto Social, cu hunto cu gobierno a pone den nos comunidad un ambiente di concientizacion riba e pobreza cu tin den nos pais y cu hunto nos tin cu traha pa alivia esaki.

http://www.diario.aw

Los comentarios están cerrados.