(Aruba) Contrato cu Jems NV ta completamente habri y transparente

ORANJESTAD (AAN) – DIARIO a tene un entrevista cu Minister di Husticia mr. Arthur Dowers, relaciona cu un critica cu a bin dilanti den un medio di prensa, acusando gobierno di a haci regalo na un compania cu ta huur trailers cu gobierno ta uza (por ehemplo na schoolnan). El a keda sorprendi cu e publicacion cu e ta kere a sali di un departamento di gobierno cu a mande pa un politico y un corant. E dignatario a splica cu loke a sosode ta un situacion existente unda cu gobierno ta paga un suma tur luna, pues no ta un cuestion cu ta algo nobo. “ Unico cos ta cu, nunca den pasado, ora cu gobierno a bay over pa paga 270 mil florin pa e trailernan cu nos ta pagando e suma aki tur luna, nunca a dicidi di pone concreto den un Decreto Ministerial, manera cu nos a haci”, Minister Dowers a señala.
Locual gobierno a bisa aworaki ta cu nan kier yega na un situacion riba un termino, unda ta bay caba di huur e tipo di trailernan aki.
“ Anto, aworaki nos ta huur nan pa 16 miyon florin y e lo bira trinta y pico miyon si nos ta yega na dado momento na un final. Loke nos a haci ta concentra un producto cu tin na Merca, cu specificamente ta wordo uza na diferente caminda aya y na otro paisnan, pa por yega na final na un cierto periodo, cu nos no mester keda paga huur mas”, Minister Arthur Dowers a señala.
El a aclarea cu esaki ta loke gobierno a pone aworaki den un contrato, y cu e no ta un fabor sino un producto cu a wordo ofreci door di un compania Mericano.
“ Nos a sali for di e punto di bista cu e producto aki a wordo uza na varios caminda caba y cu a resulta di ta un bon producto. Nos ta den discusion na e momentonan aki, concreto, con ta bay ehecuta e producto aki y e ta algo completamente habri y transparente. Esun cu ta representa e compania ta Jems N.V, y door di esey nos a opta pa traha cu nan”, e dignatario a subraya.
Minister Dowers a bisa cu si acaso tin hende cu tin problema cu esey, y principalmente esnan cu ta bisa cu gobierno no a tene un destaho publico, lo mi kier mira e destaho publico cu tabata tin den pasado, pa loke ta trata huurmento di edificionan.
“ Mi ta haya masha humoristico na e momentonan aki, cu tin critica di personanan cu a huur edificionan, no na bienestar di pueblo, entre otro un chollerhouse, simplemente pa yuda amigo y famia di partido, y a percura pa miyones di florin di pueblo a bay den esaki, sin cu e pueblo tabata tin ningun beneficio na dje”, Minister Dowers a remarca.
El a haci enfasis cu e proyecto aki ta un practica cu ta existi, cu no ta sr. Dowers a bin cune, ni a huur cerca e persona concerni sino sr. Nelson Oduber. Basa riba esey e persona a ofrece un otro producto cu ta aceptable, pero e no ta Minister su amigo aunke e conoce.

http://www.diario.aw

Los comentarios están cerrados.