(Aruba) Diego de Cuba ta informa: Dictadura den Hyatt door di hefenan grandi

Presidente di STA, Diego de Cuba, a haya sa cu e Director General di Hyatt a duna cierto empleadonan “green light” pa cana rond cu papel pa colecta firma pa boicotea e otro empleadonan cu kier afilia na STA, y asina boicotea asina, automaticamente, un lucha obreril, cu ta algo sagrado pa STA. Den curso di ayera e shopstewardnan a acerca STA, y hunto cu nan un cantidad basta grandi di miembro nobo cu a afilia na e bond.

“STA a scucha nan y a bisa nan cu locual Gerencia di Hyatt Rengency Aruba ta haciendo, permitiendo hendenan,pa durante di oranan di trabao, boicotea e sindicato y e lucha obreril, ta un acto masha baho”, de Cuba ta expresa. Comosifuera poco, nan a trece un hende di Merca “brain wash” e trahadornan, pasobra den 20 aña cu Hyatt tin na Aruba ta prome biaha cu un sindicato ta drenta. “ Nos ta compronde e dolor cu ta haci, pero ami semper a bisa cu si e empleadonan ta acercando un sindicato, ta pasobra problema tin. Caminda no tin problema e empleadonan no ta bay acerca y sindicato.

Caminda e trahadornan ta satisfecho cu locual cu nan ta haya, lo no ta haya sindicato ta drenta. Pero asina tin mal hecho ta wordo cometi contra e clase trahador, bo ta haya e gritonan aki ta cuminza sali”, palabranan textual di Diego de Cuba. Na su opinion hustamente esey ta pasando den Hyatt, un compania renombra cu aunke por tin bon cosnan pa su empleadonan, pero cu tin abuso ta tumando lugar eyden ta un hecho. “ Den esaki nos ta mira un dictadura di parti di e hefenan grandi, cu nan ta laga cierto empleadonan cana rond, cu formularionan pa purba boicotea e lucha obreril cu ta un lucha sagrado, den concepto di sindicato STA!”, de Cuba a declara na nos redaccion.

http://www.24ora.com

Los comentarios están cerrados.