(Aruba) Volumen importante di recursonan den divisa stranhero ta drenta Aruba procedente di Venezuela

ORANJESTAD (AAN): Den e ultimo añanan por a mira con na Aruba tin proyectonan cu ta worde realiza, otronan cu exitosamente a worde concretiza y cu mayoria ta producto di e capital venezolano cu a worde inverti na nos isla. Den e ultimo lustro, segun datonan suministra pa e website di Quinto Dia di Venezuela, un importante volumen di recursonan den divisa stranhero procedente di inversionistanan venezolano a ser coloca den cuentanan bancario na Aruba. E instancia regulador di banconan y otro institutonan financiero venezolano (Sudeban) a prohibi na e banconan venezolano operacionnan den dollar of otro tipo di placa stranhero bao di e modalidad di transaccionnan offshore.
E modus operandi aki ta worde realiza atravez di agentenan di colocacion cu ta dispuesto pa cambia Bolivar pa otro moneda di circulacion internacional pa asina sigura recursonan pa futuro.
Antes tabata haci uso di bononan venezolano, awor e transaccionnan ta crediticio of otro tipo di garantianan estableci entre e partidonan, segun e informe.
Hopi venezolano ta bishita Aruba, ya cu ta solamente 30 minuut ta separa nos isla for di e aeropuerto di Maiquetia, y akinan personanan y empresarionan ta busca e manera pa intercambia e moneda stranhero cu nan bolivarnan of pa realiza operacionnan cu ta sigura e balor di nan placa a largo plazo, mientras cu otronan ta bin pa cambia nan bolivar na dollar den casnan di cambio.
Segun ley, na Venezuela ta prohibi e gremio bancario pa haci transferencia di base di datonan den medionan electronico of documentonan fisico di e usuarionan na otro entidadnan financiero cu no ta opera na e pais, incluyendo operadornan cambiario fronterizo no por efectua ningun compra y benta di checknan di viahero of operacionnan den moneda stranhero.
Den e caso aki, e risico ta wordo asumi pa e persona cu lo por ta exponi na engaño of estafa cu divisanan falso of wordo deteni na e aeropuertonan venezolano, ora cu e cantidad di placa den moneda stranhero ta supera e cantidad estableci pa e ley venezolano. E persona aki ta wordo sanciona cu pena di prison pa e ley di ilicitonan cambiario.
E tendencia pa inverti na Aruba sigur ta algo cu ta hopi actual y cu sigur nos lo mira esaki aumenta te ora cu e situacion na Venezuela haya un cambio of cu e ley ta permiti e circulacion di e dollar na e pais bisiña.
Mientrastanto, Aruba lo sigui haya mas y mas bishitante di Venezuela kendenan lo bin Aruba pa haci nan compras y pa gasta nan dollar. Esnan di mas poder economico sigur, inverti den un propiedad of traha un proyecto na Aruba tambe ta un posibilidad.

http://www.diario.aw

Los comentarios están cerrados.