Aruba tin un gobierno social cu un Minister-President hopi comprometi

ORANJESTAD(AAN): No ta pasa un siman cu no tin anuncio di un acuerdo di importancia cu e actual gobierno a logra. E motor grandi tras di mayoria di e logronan aki ta e Prome Minister di e pais aki. Un persona enormente comprometi. Un persona cu un vision transcendental, di meritonan grandi y cu a worde elegi na e momento oportuno pa guia e pais aki. Prome Minister Mike Eman por a scoge pa un bida sin dolor di cabes, un bida cu un entrada comodo. El a dicidi otro. Su destino tabata marca caba den e streanan. Un dia e lo ta lider di e paraiso cu yama Aruba y su nomber y logronan lo cruza frontera. Siman pasa dos areglo importante a keda firma. Pensioen pa empleadonan di SABA a keda cla.

Alegria tabata loke tabata reina den e casnan di anciano ora e noticia aki a drenta. Tur esaki danki na trabao inmenso di e actual gobierno social. Tambe a firma un protocol cu Institutonan Financiero cu ta na beneficio di economia y comunidad completo di Aruba. Empresanan chikito y mediano ta bay worde yuda, mescos cu hobennan, tambe esnan cu ta caba di studia lo worde incentiva pa regresa nan pais y Stadsherstel NV ta bira un realidad.
Na oktober 2009, ora cu e gobierno nobo a sinta cu Mike Eman como su Prome Mandatario, Aruba tabata den escombro. Valero a anuncia cu e lo sera su portanan y miles di hende sin trabao tabata e futuro di Aruba. Carnival Cruise Lines a dicidi di stop di bin Aruba y KLM a cancela su vuelonan. E relacion cu Hulanda tabata malisimo.
E animosidad cu tabata reina entre e paisnan den Reino a hasta bira visibel y e desconfianza den politica a yega punto cero. Probresa tabata asota e habitantenan y decadencia a haci su entrada. Un debe externo haltisimo, un economia na rand di un abismo scur y un raport devastador di FATF cu consecuencianan negativo pa Aruba si nada worde haci.
APFA tabata halando su ultimo roseanan y AZV tabatin mester di ayudo di inmediato. No tabata existi ningun sorto di dialogo y e pensamento di e gobierno di e tempo ey tabata di “laisser faire”.
Un grupo chikito so tabata gosa. E sentimento social den tur sentido no tabata tey. E escena describi ariba tabata e Aruba cu Mike Eman y su gobierno a bin topa cune na oktober 2009.
E gobierno nobo no a perde tempo, pasobra cu no tabata tin tempo pa perde. Mester a lora manga di camisa, pone schoudernan hunto pa saca Aruba di e desaster cu e tabata aden.
Intervencion inmediato y energico tabata necesario.
Cu un maneho socio-economico y financiero bon delibera,Gabinete Mike Eman a scoge pa e siguiente procedimento: controla e crisis, sanea finansa publico, trece back e confianza den Aruba tanto local como den Reino, mehora e actividadnan economico esencial y pa di e forma aki finalmente yega na un crecemento economico duradero.
Despues di reunionnan intenso entre Gobierno y Valero, e ultimo aki a dicidi di lo continua cu su produccion. Un alivio grandi a worde sinti den tur skina na Aruba. Pan di miles di hende a keda sigura cu esaki.
Prome MInister Eman a logra convence KLM pa reanuda su vuelonan pa Aruba. Na februari 2010 e parha blauw a bolbe pisa tera aki y e alegria tabata bisto riba cara di tur hende cu ta stima e isla aki.
Carnival Cruise Lines tambe a pone Aruba back den su itinerario y American Airlines a amplia su vuelonan pa Aruba. Logronan impactante di un gobierno di ni 6 luna na mando! Despues cu e relacion cu Reino pa e ultimo añanan tabata bou presion enorme, Prome Minister Eman a trece cambio den esaki.
Hulanda ta cooperando cu Aruba riba varios tereno y asina Aruba ta probechando di loke Hulanda y Union Europeo ta brinda nos. TNO pronto ta aki, mescos cu GasUnie. SchipholGroep tey caba mescos cu Rietveld Academie.
E logronan aki nunca tabata posibel si e ambiente di hostilidad a keda. Un gobierno drechi a logra cambia e rumbo robez aki. Gobierno aki a logra pone partidonan na mesa pa yega na acuerdonan importante. E Plataforma Dialogo Social ta un tremendo logro cu no conoce su igual.
Hunto na mesa ta logra e miho pa Aruba y su hendenan. Tur sindicato, gremionan social y otronan envolvi ta worde invita pa ta parti di e Dialogonan Social cu ta tuma lugar regularmente na Aruba.
Protocolnan importante a keda firma cu ta beneficia e pueblo di Aruba. Den un temporada cortico di gobernacion e actual Gabinete a logra hisa onderstand cu 25%. Banda di e aumento aki a introduci un schoolkinderentoeslag di 200 Florin pa luna pa cada yiu di un famia di menos recurso.
Reparatietoeslag ta algo unico cu a worde introduci y cu a yuda 26 mil empleado cu tin un entrada bou di 2500 pa luna. A sanea e situacion precario di APFA y AZV. A bin cu areglo di pago di awa y coriente y 600 famia na Aruba ta haciendo uso di esaki. Pensionadonan di gobierno a mira nan pensioen completa y a haya 105 Florin extra.
Pensionadonan cu ta cobra AOW tambe a haya toeslag. Barionan tur rond Aruba ta hayando atencion. Verfmento di casnan di pueblo ta tumando lugar den barionan. Pensioen General ta na caminda. E prome pasonan den e direccion aki a worde tuma caba.
FATF a duna gobierno e bon noticia cu danki na e esfuersonan grandi haci cu Aruba lo no worde scrutina mas manera lo tabata e caso si nada a worde haci. Un logro mas di Gabinete Mike Eman.

http://www.diario.aw

Los comentarios están cerrados.