(Aruba, Curaçao y Bonaire) Soldatnan a uza avion remote control pa haya inteligencia

Training di Mariniers entre Aruba, Curaçao y Bonaire, pa prepara soldatnan pa combate rond mundo
ORANJESTAD(AAN): Diahuebs DIARIO a entrevista Edwin Hofman comandante di mariniers Kazerne tocante un training cu a tuma lugar den Parke Nacional Arikok. Hofman a splica cu tin un training grandi ta tuma lugar riba Curaçao, Bonaire y Aruba. E ta un training di certificacion pa un batayon di Marinier. Hofman a splica cu si nan worde certifica, nan ta cla pa worde manda pa bringa rond mundo. E comandante a splica cu nan ta haci uso di e barco di guera Johan de Wit cu tabata para dilanti di costa di Aruba un cantidad di biaha.
Botonan por Sali bay for di elugar unda e barco ta staciona y helicopternan por ateriza riba e barco y Sali bay for di e barco. Segun Hofman, mas di 600 soldat por subi abordo di e barco.
El a splica cu cada batayon di 150 soldat ta haya un tipo di situacion cu nan tin cu atende cune na Bonaire.
E ta worde yama un “non combat evacuation operation”, cu ta un ehercicio di evacuacion.
E ta encera cu for di laman hendenan riba tera ta worde evacua y despues nan mester worde hiba back.
Na Curaçao e batayon ta haya un otro opdracht cu ta worde yama “counter insurgency”.
E ta algo manera locual ta pasando na Afghanistan, na unda Mariniers a hunga un rol tambe.
Un di e gruponan cu ta train actualmente ta un grupo cu pronto ta bayendo pa Kunduz Afghanistan.
E parti di e training cu ta tuma lugar na Aruba ta esun yama “hoogste geweld spectrum”, unda cu e soldatnan mester uza accionnan feroz di atake, pa asina elimina e enemigonan.
Hofman a splica cu for di algun tempo caba Kazerne a papia cu e Rangers di Parke Nacional, pa tur cos worde regla pa e training importante. El a splica cu e trainingnan ta bayendo hopi bon.
Un demostracion a worde duna tambe di e ‘Raven’ cu ta un avion di reconocimento, cu cual por bula over di lugarnan y acumula informacion di combate.
Tabata tin un supuesto campamento di terorista riba Yamanota y cu e avion ‘verkenner’, mester a bula over di elugar, pa e comandante di e mision haya un bon idea di kico tur su batayon lo por topa cune, pa asina traha su plan di atake.
E avion ta graba imagennan hopi bunita y cla, cu por worde uza. E Raven pues ta un avion chikito control remoto cu ta worde uza. E avion ta ocupa cu aspectonan special cu ora cu no tin conexion mes pa bula control remoto, e ta bolbe back na elugar di origen automaticamente.

http://www.diario.aw

Los comentarios están cerrados.