(Curazao) Vice-presidente di PdVSA Asdrubal Chávez ta bin bishitá Kòrsou

Promé-Minister Gerrit Schotte a reuní djarason mainta na Caracas Venezuela, ku vice-presidente Asdrubal Chávez di Petroléos de Venezuela S.A. (PdVSA). Durante e reunion nan a diskutí ampliamente futuro di e refineria na Kòrsou i e koperashon ku PdVSA. PdVSA a deklará ku nan ta kla pa sigui papia tokante e invershonnan nesesario den e refineria, i tambe otro aspekto di koperashon entre Venezuela i Kòrsou riba tereno energétiko.

Pa e motibu ei sr. Chávez lo bishitá Kòrsou fin di otro siman pa sigui prepará kombenionan konkreto. Pa basta aña kaba e diskushonnan entre Kòrsou i Venezuela tokante futuro di nos refineria ta stanká, i no ta tin klaridat riba e plannan di PdVSA pa ku e refineria na Kòrsou. E aktual kontrato di “lease” ku PdVSA komo operadó di nos refineria ta vense den aña 2019 i mester analisá for di awor si nos ke sigui operá e refineria, i – si esei ta e kaso – den ki forma, ku ken, i bou di kua kondishonnan. Tambe tin sierto situashonnan agudo ku mester keda atendé, entre otro e aspekto di polushon via emishon den aire i tambe polushon di nos tera i awa.

Promé-Minister Schotte a hiba un diskushon habrí ku vice-presidente Chavez djarason mainta kaminda el a splika e situashon nobo estatal, e estudionan ku gobièrnu di Kòrsou ta ehekutando pa ku futuro di nos refineria, i e situashon di molèster ku e refineria ta kousa tantu ku emishon den aire, komo polushon di tera i awa. PdVSA a mustra e boluntat pa yega pronto na desishon pa ku e futuro di e refineria na Kòrsou, i tambe a mustra atenshon realístiko pa e problemátiko di polushon. Pa yega na desishonnan Promé-Minister Schotte a invitá sr Chávez pa mas pronto posibel duna follow up na loke mester sosodé, i nan a yega na e afsprak ku fin di otro siman e vice-presidente di PdVSA lo bishitá Kòrsou pa un reunion di trabou ku ekipo di gobièrnu, kaminda lo stipulá e trayekto pa yega na kombenionan konkreto entre e paisnan.

http://www.24ora.com

Los comentarios están cerrados.