(Aruba) Yayinca 2 a sink den awanan di Aruba carga cu bari di gasoline

E fenomeno di contrabando di gasoline a bira algo masha publico ultimamente. Aunke nan drenta cu e gasoline pa consumo local for di Venezuela y paga accijnze tog e ta sali hopi barata. Esey mes ta loke Yayinca 2 a bin haci na Aruba. Si na Venezuela nan descubri loke a sosode e por bira un problema pa ambos tripulante di e boto cu a sink diamars mainta.

Biniendo riba e caso mes ta asina cu a drenta informacion cu tin un boto ta sink pazuid di Valero. E pocision exacto no tabata conoci e momentonan ey. Mas bien a menciona pazuid di refineria y a base di esey mester a bai busca e boto den problema. Segun e rescate tabata saliendo a drenta informacion cu e boto Venezolano Yayinca a sink. E momento ey esnan di Aruba Ports a pone mas presion riba e rescate notificando tur embarcacion den area pa cuminsa tira bista riba hendenan cu lo ta abordo. Helicopter a sali, kustwacht, yatenan di placer tambe a wordo notifica.

E buskeda a duna su fruto pasobra na dado momento helicopter a topa cu dos persona ta drief den awa. A keda bula riba nan pendiente e yegada di e boto di kustwacht. A logra rescata ambos y nan a confirma cu no tin mas hende. Despues cu nan a wordo rescata a keda peliger riba lama. Varios bari yen di gasoline a keda drief. Tur embarcacion mester a nabega wowo habri. Ambos tripulante a wordo hiba waf di Barcadera caminda cu nan a ser interoga. Parce cu siman pasa nan tabata na Aruba caba. Nan lo ta treciendo gasoline pa un tal R aparentemente cu ta di Aruba.

Esaki ta negoshi cu ta wordo haci. E gasoline a drenta legalmente na Aruba pero ta sali di contrabando for di Venezuela. E gasoline cu ta wordo bendi na Venezuela na su mesun hendenan ta pa nan uso propio y no pa ser exporta pa wordo bendi. Esey caba ta contrabando. Na Aruba autoridad no por haci mucho pasobra nan no a viola leynan di Aruba si paga e accijnze riba e gasoline. Awor nan mester haya yudanza dor di logra consulado Venezolano pa logra bai bek nan pais. E boto a bai perdi y no ta conoci con a para cu e cantidad di bari di gasoline cu a keda benta den awanan teritorial.

http://www.24ora.com

Los comentarios están cerrados.