(Aruba) E formacion di e pueblonan di Venezuela y Aruba tin e mesun origen Indian

ORANJESTAD (AAN) – Consulado di Republica Bolivariana di Venezuela na Aruba, a cuminza cu e celebracion di e Bicentenario di Independencia (200 aña), di Venezuela, diadomingo cu a pasa cu un Santo Sacrificio di Misa, y diamars 5 di Juli, cu ta e fecha oficial, a tene su acto protocolar riba Plaza Simon Bolivar, cu presencia di un delegacion di Gobierno di Aruba, encabeza pa Prome Minister Mike Eman.
Diamars anochi e consulado a brinda un recepcion, unda Premier Eman a tene un discurso na Spaño, cual nos ta transcribi na Papiamento.
“ Nos ta hunto awe pa comparti cu Venezuela y e Venezolanonan residente na Aruba, y cu pueblo di Aruba en general, cu tur dia ora nos ta lanta mainta nos por mira Venezuela, no mucho leu di nos propio Isla. Ta cu respet pa e lazonan historico cu nos tin cu nos Madre Patria, Hulanda, mi ta bay bisa un dicho hopi comun meymey di nos: ‘ta mehor pa tin un bon bisiña cu un famia hopi leu’.

Aruba, tin Venezuela como un bon bisiña, cu ken nos ta comparti no unicamente e idealnan di libertad, aspiracionnan di progreso, dedicacion na trabao, pero tambe un comunidad cu a desaroya su mes a base di e mesun curpa di hende cu nos Creador a regala nos: e Indiannan cu a forma e sociedad di Venezuela ta mesun nan cu a forma e comunidad di Aruba for di su origen.
Poco ta e paisnan cu por bisa cu nan tin lazonan comun, a base di un pueblo en comun, y Aruba y Venezuela por bisa cu e lazonan cu nos ta comparti no ta solamente di dos pais hopi cercano pero di paisnan cu ta comparti un pueblo comun; algo cu mi ta sinti cu nos mester celebra en grandi.
Pesey mi a invita e Consul pa e aña aki cu nos ta celebra 25 aña di Status Aparte di Aruba, orguyo di nos autonomia, orguyo di nos idealnan di pone meta y realiza nan, pa sali hunto den un gira, pa duna respet na e comunidad aki cu a wordo forma den e prome oranan di nos Isla y di Pais Aruba, nos sociedad cu ta e Indiannan Caquetio- Aruwaknan”, e dignatario a expresa.
Prome Minister a duna muestra di respet na e antepasadonan aki, bisando cu nan ta e ciudadanonan di e prome momentonan di nos Isla, cu a inspira y forma nos pueblo, cu a laga pe un historia hopi largo, di trabao duro y dedicacion na e respet propio, solidaridad y hermandad.
“ E lineanan invisible di solidaridad cu ta forma nos como amigo, entre Aruba y Venezuela; e lineanan invisible di amor, di comparti, ta e lineanan cu ta trece nos hunto awe, pa celebra e Independencia di e Pais Venezuela, cu un historia tan rico cu tin un simbolo di e Libertador, cu no ta unicamente e simbolo di un gran heroe y lider di un pais, pero di henter mundo”, Prome Minister a acentua.
“ Venezuela por ta orguyoso di tin e Libertador di mas grandi cu Universo a produci. Esakinan ta talentonan cu solamente nos por haya door di bendicion di nos Creador. Y como respet na e talentonan aki cu nos a ricibi di nos Creador, awe mi kier bisa den nomber di Gobierno di Aruba, masha danki na tur e Venezolanonan trahando tur dia na Aruba.
Hopi biaha mi a bisa cu no tin un school, no tin un caya, no tin un edificio, no tin un servicio na Aruba lanta cu exito, cu no tin un man, energia of dedicacion di un Venezolano residencia na Aruba. Hopi danki pa su dedicacion, hopi danki pa su pasion, hopi danki pa celebra hunto cu nos tur aña, riba dia 18 di Maart cu nos ta celebra nos Dia Nacional, unda mi por mira den tur parke di Aruba, personanan cu ya a haci nan mes parti di e sociedad aki, y cu ta sinti mescos cu nos cu e calor, dedicacion, y amor ora di scucha e “Gloria al bravo pueblo” pero tambe “Aruba dushi tera” di Padu Lampe.
“Amigonan, cu Dios guia nos den e trabaonan importante cu nos tin cu haci pa nos paisnan, cu Dios sigui guia e Consul hoben, cu ken den e corto tempo cu mi tin como Prome Minister, experencianan cu ta hopi determinante cu nos tin awe pa e celebracion entre Venezuela, Aruba, y e Reino di e Paisnan Baho.
Nos ta sinti cu aki algun aña, probablemente nos lo wak e tambe den otro pantaya na Venezuela, cu nos lo por sigui for di akinan. Hopi exito, señor consul! Amigonan, Venezuela por sinti su mes orguyoso di su historia, triunfonan, dedicacion, y hunto nos lo supera hopi reto ainda, y traha pa un mehor futuro pa nos pueblonan. ‘Gracias y que Dios les bendiga!” Prome Minister a expresa pa conclui su discurso.

http://www.diario.aw

Los comentarios están cerrados.