(Aruba) Premier Eman na comunidad Venezolano: Boso ta parti di e comunidad aki

Den presencia di dignatarionan local y invitadonan hunto cu representantenan di Republica Bolivariano di Venezuela, a tuma luga ponemento di krans na Plaza Siman Bolivar den cuadro di celebracion di e Bicentenario di Independencia di Venezuela. Prome Minister Mike Eman tabata masha elocuente y cordial cu esnan di nos pais bisiña, señalando e esencia di un comunidad den un pais y su importancia.

Pulse para ver fotos

“Aruba y Venezuela tin un comunidad comun. Hopi aña, siglonan anterior, nos tabatin aki na Aruba Indjannan cu tabata forma parti di Venezuela y tambe di un isla cu aspiracionnan grandi manera otronan na mundo,” Prome Minister Eman a trece dilanti na e ocasion aki. E soño y idealnan comparti a trece dilanti personahenan cu e boluntad y sentido di responsabilidad pa realisa e soñonan di e comunidad cu nan ta representa. Eman a referi na un di e lidernan grandi manera Simon Bolivar, kende a realisa e soño di e hendenan di Venezuela y Sur America pa un miho bida. El a señala riba tur e desaroyonan cu a sigui y cu awe ta asina leu cu por celebra e Bicentenario hunto cu Aruba.

El a afirma cu Aruba ta extende un man na Venezuela pa hunto construi e desaroyo cu ta duna tur su ciudadanonan e futuro cu nan merece. Den esaki el a gradici e Consul pa su amistad special pa cu Aruba y e miho lazonan cu semper e ta lucha p’e. Prome Minister Eman a ricibi un cuadra di Simon Bolivar regalo for di Consul Venezolano y a sigura e representante di Venezuela cu esaki lo haya un lugar prominente den oficina di Gobierno. “E ta bay recorda nos riba soñonan comparti y responsabilidadnan pa futuro generacionnan. E compromiso di Gobierno di Aruba ta cu tur esnan cu ta biba na Aruba, sin diferencia di origen, raza of religion sinti nan mes parti di e isla …. “Boso ta forma parti di nos comunidad.” Eman a agrega di ta comparti cu Venezuela e momento di celebracion no solamente pa e fecha aki pero tambe ta manda palabranan di pronto recuperacion pa e Presidente di Venezuela. Pa finalisa, e mandatario a papia di un bishita cu e lo realisa pa Venezuela na un comunidad indigena cu tin relacion comun cu e comunidad antes di Aruba.

http://www.24ora.com

Los comentarios están cerrados.