(Aruba) Juni a conoce un crecimento record di 13.2% den turismo

ORANJESTAD(AAN)– DIARIO a haya e informacion extra oficial cu luna di juni tabata uno record den turismo, yegando na un nivel cu desde 1997 no a wordo mira; nada mas y nada menos cu 13.2%. Awe tardi ATA lo tin un conferencia di prensa caminda lo presenta e cifranan di e prome 6 lunanan di aña y seguramente durante esaki e record aki lo wordo notifica na pueblo di Aruba. E crecimento record aki por wordo mira como resultado di e bon maneho hiba dor di Minister Otmar Oduber encarga cu turismo, pero tambe como resultado di a logra despues di 25 aña di discusion, un ATA independiente.
E cifranan exacto DIARIO no a haya ainda, pero cu e porcentahe aki por deduci cu ta trata di cifranan hopi positivo cu lo tin un impacto alentador pa economia di nos isla.
Den declaracionnan di Minister Oduber por a sucha cu a calcula un crecimento di 3% den turismo pa 2011, algo cu cifranan di e prome 6 lunanan ta demostra cu no solamente lo wordo logra, sino cu e lo wordo surpasa grandemente.
Mas ainda teniendo na cuenta e anuncio di Otmar Oduber dialuna cu lo tin vuelonan extra y destinacionnan nobo for di diferente destinacion.
DIARIO ta felicita henter comunidad cu e crecimento aki pasobra ta cada un di nos cu ta biba riba Aruba ta wordo beneficia ora e sector mas importante di nos economia crece.
Den nos edicion di mañan nos lo trece mas detaye riba e datonan cu lo wordo presenta awe tardi door di oficina di turismo.

http://www.diario.aw

Los comentarios están cerrados.