(Aruba) Vuelonan di Europa y Latinoamerica pa Aruba den aumento!

Charternan for di Venezuela a sobrepasa e ultimo 3 añanan!
ORANJESTAD (AAN) – Minister Otmar Oduber, titular di Turismo a relata den conferencia di prensa, dialuna, con e desaroyo di transporte aereo entre Europa y America Latina cu Aruba ta, na e momentonan aki.
EUROPA:
E dignatario a bisa cu KLM a aumenta su vuelonan pa Aruba, y cu e cambio cu ta biniendo e dos vuelonan semanal cu tin actualmente lo aumenta pa cinco.
E mandatario a señala cu, naturalmente, e estrategia di tin e avionnan aki designa na Aruba y Bonaire, envez di e manera con e tabata prome Curacao-Aruba, ta duna un cantidad di stulnan hopi mas amplio y comodo, pa Aruba tambe por haci su diferente estrategianan cu Europa.
E titular a señala cu cifranan cu tin incluyendo Mei, ta papia di aumentonan di casi 7% for di mercado europeo, y den e rosea aki e ultimo bishita cu su persona y ATA a realiza na Hulanda, a mustra cu tur e partnernan cu Aruba tin aya, ta sumamente satisfecho cu e producto y e estrategia cu tin poni “in place”.
Oduber a agrega cu mescos ta conta pa Arke Fly, cu un di su vuelonan importante ta worde designa pa Aruba y Bonaire, exclusivamente, y no manera antes cu tur tabata destina pa Aruba y Curacao.
E estrategia aki ta habri un cantidad di stul adicional na un base semanal pa nos pais. E mandatario a referi na Blue Panorama ta un vuelo charter cu ta continua despues cu inicialmente a bin pa un periodo cortico, entre Italia y Aruba.
Curacao ta duna garantia pa e vuelo aki, pero no den caso di Aruba cu ta solamente dune sosten den mercadeo. E dignatario a subraya cu asina no solamente a logra mantene pero continua pa un periodo mas largo cu esun cu inicialmente tabata tin.
E dignatario a acentua cu “Idea Viaggi”, pa loke ta trata e cantidad di pasahero, a aumenta esaki di 80 pa un capacidad di 160. E charternan for di Scandinavia ta continua tambe, cu un capacidad cu a keda sin worde interumpi, unda cu pa cierto temporada so nan ta bula, pero aworaki por mira cu nan ta extende nan actividad pa un periodo mas largo, y lo sigui asina durante 2012.
E continuidad di e charternan aki ta mustra cu tin confianza den e mercado y no solamente esaki sino un potencial hopi grandi pa loke ta trata aumento di e vuelonan aki.
LATINOAMERICA:
Minister di Turismo a señala cu despues di e alianza Avianca- Taca cu ta uno basta largo unda cu ehecutivonan halto di e aerolinea aki a bishita Aruba, mas of menos tres of cuatro siman pasa, nan a mustra un confianza y partnership serio, cu Aruba.
E compania a cambia e ekipo cu nan tabata uza pa Aruba, pa un avion mas grandi cu 30 stul mas pa vuelo, loke ta nifica 210 stul adicional. Tambe tin conversacion ta tumando lugar cu nan, riba e posibilidad pa aumenta e cantidad di vuelonan pa Aruba, mirando e mercadonan cu nan ta “feeder” pa Aruba, cu ta Brasil y e crecimento cu tin for di Colombia, cu ta haci cu mas stul ta na su lugar.
Tocante COPA, e dignatario a menciona cu e compania a cambia su horario di salida pa 2’or di atardi, locual ta hopi importante pa e conexionnan for di e diferente otro “feeder” cu ta drenta den Panama y bin Aruba.
E dignatario a refuta cu tin posible disminucion di vuelo di COPA pa Aruba. E compania a confirma na e minister cu esey no ta berdad, mas bien nan ta sumamente positivo y ta mira cu 2012 lo ta mehor.
For di Venezuela, e dignatario a bisa cu e vuelonan charter adicional a sobrepasa e ultimo tres añanan, y esaki a base di e maneho di gobierno y su conversacionnan na Venezuela pa logra elimina e obstaculo cu tabata tin, pa charternan por a bula pa Aruba.
For di e momento ey, segun e mandatario, por papia di un bon cantidad di capacidad di stul cu a aumenta cu mas cu 25% pa Aruba, y esaki tambe ta bisto den e resultadonan te cu Mei, cu ta mustra un aumento di 30% di pasaheronan for di e mercado Venezolano.
Finalmente, e dignatario a señala cu un charter for di Ecuador a inicia pa algun siman y cu lo mester a finaliza siman pasa, pero por mira e intencion cu tin pa continua cu un cantidad di vuelo, locual ta algo sumamente positivo, apesar cu ta un mercado den cual Aruba no ta inverti hopi den dje. Pero a base di bishitanan cu tin cada bez di diferente aerolineanan na Aruba, por a logra di capta nan atencion y na e momentonan aki tin un vuelo sumamente exitoso pa Aruba.

http://www.diario.aw

Los comentarios están cerrados.