(Aruba) Yen di hende cu papel diabolico den e drama aki, di traidor te fariseo

ORANJESTAD(AAN): Diabierna cu a pasa Booshi Wever a bin afo pa bisa mundo henter pakico e no kier ta lider mas di fraccion di su partido ni ta interesa mas pa postula su mes como candidato pa bira lider di MEP. Pero, asina mes, apesar di tur humiyacion e lo no bandona su votadornan y a bira un Parlamentario sui generis pa MEP den Staten. Kico esaki exactamente ta nifica den practica tempo lo mester mustra. Ningun hende sa si mientrastanto MEP a pidi’e su asiento back of a cambia slot di porta di oficina di MEP den Parlamento manera e mes a haci cu coleganan Marisol y Mervin, kendenan a worde sacrifica na mal ordo door di nan partido. Cu nan baymento e decadencia den MEP a cuminsa. E dolor y humiyacion mas grandi di Booshi ta cu a primintie cu e lo haya sosten pa bira lider di partido MEP. Un promesa haci door di lider di partido Nelson Oduber!! No por ta otro cu aki Booshi tin rason. E cuchio den su lomba ta stake duro.
Pasobra cu el a sacrifica hopi pa un dia por a bira lider di e partido cu a worde funda door di un persona cu tin su admiracion completo, Betico Croes. Pakico otro cu no ta pa bira lider cu Booshi a keda den Parlamento perdiendo di e forma aki un tremendo presion.
Si el a haci manera Nilo a haci, kende si a scoge pa placa y a laga idealnan politico un banda, e por ta cobrando un pensioen masha comodo mes y lo no a bay atras cu algun mil Florin pa luna na entrada. El a escoge pa su partido ya cu el a kere den palabra di su lider. Un lider cu a resulta di ta un mentiroso grandi. Un homber cu no tin palabra di homber.
Awor Booshi Wever a perde cangreu cu saco. Djis door di a confia den palabra di un hende cu no ta homber di palabra. Tambe el a confia den palabra di dos colega di partido. Ady Thijsen y Evelyne Wever-Croes. Ambos a gañe cu nan lo no postula nan mes como candidato pa bira lider di MEP.
Ady a hasta hunga wega di sisheria y a bin murmura den su horeanan cu tin un wega andando den partido sin bise cu e autor principal di e wega ta e mes y cu Booshi e victima. Ady, un colega di partido cu kende Booshi Wever a hiba batayanan fuerte ta stake un puñal den lomba y mientras cu su amigo di partido ta na suela ta stake un bes mas.
Vale la pena pa tin amigonan asina. Pakico Ady a postula su mes ta keda un misterio tambe, pasobra e sa cu su candidatura ta masha zwak mes y cu e no tin ningun chens. Sigur no cu tur e caymannan na boca di riu. Djis pa stroba Booshi el a haci e zet aki? Awor Evelyne, un otro persona cu no tin mucho problema pa papia mentira, den un defensa debil ta bin declara cu ta su votadornan a pidie pa postula su mes. Esta un coi kens. Si ta asina mes , bo ta comunica esaki na bo colega di partido tog.
Si Evelyne tabata un hende drechi y un muher di caracter e no a laga su mes worde manipula pa e mal consehonan di su tata, e a scoge pa ta sincero. E mester a contesta su votadornan cu ya tin palabracion haci caba cu un hende cu tin añanan den partido, un persona leal na partido cu a sacrifica durante 28 aña y pico un cantidad pa partido, lo bira e proximo lider di MEP.
Tanto haragan asina ta obvio. Evelyne a mustra un biaha mas su cara falso. Aki no tin hustificacion. Esaki ta un acto di traicion. Booshi Wever tampoco ta completamente honesto cu su mes ni cu su partido.
Na december ora cu Marisol y Mervin a vota na fabor di un mocion di AVP den Parlamento – nan unico pica – nan a worde crucifica den e palo di mas halto cu MEP por a haya. Nan a worde saca na mal ordo di partido y Booshi tabata parti di e lynchmento publico aki. E mes a admiti di e vota na fabor pa nan entrega nan asiento back na MEP.
Awor ta con anto?? E mag di keda den un posicion cu e mes a traha pa su mes y e dos otronan cu a sigui nan consenshi den votacion, a worde saca manera cacho riba caya. Den e teatro dramatico aki tin hopi autor cu ta hunga un papel diabolico. Un mas pio cu otro. E drama no a caba ainda. Marisol y Mervin ta e “lachende derde”.

http://www.diario.aw

Los comentarios están cerrados.