(Aruba) Proyecto gasoducto di Venezuela pa Aruba ta canando slow!

ORANJESTAD (AAN) – Pa splica cu e gasoducto di Venezuela pa Aruba no ta un proyecto facil, y menos na corto plazo, Minister Mike de Meza a cuminza pa splica, den conferencia di prensa, cu e crisis petrolero y su consecuencianan cu nos ta bibando awor, tabata pronostica for di añanan 60. E mes a bin ta alertando y mustra riba e crisis cu ta existi mundialmente, pasobra e no ta algo nobo sino cu for di añanan 60 bin ariba esaki a wordo pronostica, a base di datonan cientifico y bon argumenta.
E mandatario a comenta cu for di e temponan ey, hopi no kier a kere den dje. El a bisa cu su mes persona den Parlamento, for di aña 2005, a keda enfatiza riba e tema aki regularmente, y a bin cu diferente mocion.
El a keda cuestiona e maneho di e gobierno na mando e momentonan ey, cu tabata tin falta di un maneho con pa deal cu e situacion aki cual no ta bay cambia den e añanan nos dilanti.
Segun Minister de Meza, pronosticonan internacional, door di institucionnan renombra rond mundo, tambe ta demostra cu nos ta sigui bay den un era di dificultad riba e produccion di energia.
Minister Mike de Meza a acentua cu na momento cu Gabinete Mike-1 a asumi e poder, a bin cu un maneho total riba energia, unda a tuma e decision pa aumenta e capacidad di e mulinanan di biento cu ta necesario.
E mandatario a subraya cu, manera Minister Presidente a bisa, esaki ta mas barata cu e prijs cu tin mundialmente riba e mercado di fuel oil, y cu den e añanan cu ta bini no ta bay baha mucho.
Pa Aruba e situacion ta bay bira mucho mas dificil, y e mandatario a reitera cu nos pais tin cu prepara pa esaki for di e momentonan aki.
No obstante e mandatario a elogia e proyectonan di WEB cu di un sistema convencional di recursonan fosil manera fuel oil, cu ta deriva di petroleo, ta cambiando su ekipo pa bay den un sistema cu tin un rendimento mucho mas halto, y esaki ta un bon direccion.
No obstante, segun e dignatario, esaki so no ta scapa Aruba di e efectonan internacional. Tambe gobierno a tuma e decision di bay amplia e poder di biento y ta bin cu un parke nobo di mulina di biento, pa redobla e capacidad cu tin awor, y ademas lo bin cu un proyecto di panel solar, pa haci uso di e energia solar, cual ta e direccion cu mas y mas ta bayendo mundialmente.
Minister di energia a enfatiza cu un proyecto hopi importante den e alternativanan aki ta e recurso di gas natural, pa contraresta e aumentonan di prijs di combustible deriva di petroleo.
Un di e proyectonan cu gobierno ta bezig na e momentonan aki ta e uso di gas natural den un combinacion di Venezuela cu Colombia, y den e cuadro aki aña pasa Minister Presidente hunto cu e minister Hulandes di Relacionnan Exterior a bay Caracas, y a sinta na mesa cu e Minister di Estado di Venezuela pa firma un protocol, di cual un parti grandi di dje ta encera e posibilidad di estudionan, y pa mira si tin espacio pa yega na un acuerdo entre ambos pais, den e caso aki pa haya gas for di Venezuela.
No obstante esaki no ta bay den “un dos tres” manera tin hende ta pretende, y nos tur sa e dificultadnan cu tin cu nos bisiñanan pa zuid, segun e dignatario, ademas di e situacion na Venezuela mes pa cu gas.
Trece for di Colombia ta algo basta complica, ya cu pa nan mes no tin suficiente. Nan tin reservanan grandi pero un mina asina aki, no ta den un frega di wowo por pone den operacion, pero esey ta algo cu ta tuma varios aña.
Minister Mike de Meza a subraya cu tur esaki mester wordo tuma den consideracion, como tambe e decisionnan geopolitico cu tin den cada pais.
Minister de Meza a referi na e bishita cu riba nivel halto, cu a tuma lugar na Caracas entre e Embahador di Hulanda na Venezuela y e Minister di Energia y Minas di dicho pais y ehecutivonan di P.D.V.S.A, pa discuti riba e proyecto di gasoducto y e resultadonan tabata positivo.
No obstante e proyecto aki ta cana hopi slow y e decisionnan na nivel mas halto na Venezuela no a wordo tuma ainda, pasobra tin otro evaluacionnan cu mester tuma lugar tambe, y gobierno di Aruba ta keda pusha esaki pa wak si e por tuma lugar mas rapido posible.

http://www.diario.aw

Los comentarios están cerrados.