(Aruba) Prome Minister Eman a anuncia cu por lo pronto ta para aumento di prijs di awa y coriente

ORANJESTAD (AAN): “Sinceramente nos ta lamenta cu for di WEB ta sali un declaracion cu nan ta evalua aumento di prijs di awa y coriente pa luna di juli. Esaki pa nos ta inaceptabel”, palabranan di Prome Minister Mike Eman durante un conferencia di prensa cu a worde yama den forma urgente. Prome Minister Eman a splica cu siman pasa caba WEB a informa gobierno cu a base di e desaroyonan di prijs di fuel oil riba mercado mundial nan ta premira cu si no haci ahustacionnan atrobe na e prijsnan di awa y coriente, WEB lo core cu perdidanan cu nan a bin ta registrando algun luna caba ya cu nan no ta haciendo e ahustenan di prijs na e mesun nivel di prijs di fuel oil cu a aumenta.

Prome Minister Eman a bisa cu a informa WEB cu gobierno ta mira e aumento di prijs aki cu hopi inquietud. “Esaki ta afecta severamente e poder di compra di nos conciudadanonan den un forma hopi directo”. Eman a sigui bisa cu segun cifranan di CBS un di e gastonan cu mas ta pisa riba e presupuesto di un famia ta e prijs di awa y coriente.
Sigur ora e prijsnan aki ta fluctua den un forma dramatico door di e mercado internacional, esaki ta pone cu e presupuesto familiar ta bira casi imposibel pa regula. Pa esnan di menos entrada esaki sigur ta un problema. Banda cu e aumento continuo di prijs di awa y coriente ta afecta e poder di compra di nos ciudadanonan, e ta afecta tambe e desaroyo social-economico di pais Aruba.
Banco Central a afirma cu e aña aki Aruba ta bay conoce un crecemento di 10% di su GDP cu ta un crecemento considerabel, despues di caidanan na 2009 y 2010. Eman a bisa cu esaki ta despues di esfuersonan grandi haci door di gobierno. Entrada di gobierno te cu luna di mei tambe a subi cu 10% cu ta indicativo di e crecemento economico ya cu gobierno no a haci ningun cambio den su sistema di impuesto ni tampoco a bin cu ningun aumento.
Esaki ta nifica cu e entrada aki ta basa riba e crecemento economico cu ta worde mira cla den loonbelasting y impuestonan di inversionnan. Desempleo cu tabata rond di 10% na momento cu e gobierno aki a sinta, awe a baha cu 3%. Indicadornan positivo pa un desaroyo hopi prometedor, asina Eman a bisa.
“Mirando den e contexto aki e efecto cu aumento di prijs di awa y coriente tin riba e poder di compra di e ciudadano, e efectonan negativo cada biaha ta afecta e ambiente di inversion, e ambiente di confianza y optimismo den e desaroyo social-economico, nos a bisa WEB cu nos kier mira e dearoyo aki mas cu solamente den cuanto WEB ta gana of perde.
Nos kier sa cua ta e rol cu gobierno por tin den esaki, si mester bay Parlamento, si mester yena un buraco di tanto miyon y wak con evita e aumento aki. Laga Parlamento y gobierno dicidi si ta paga e aumento di prijs pa stabilidad di e poder di compra y e stabilidad di e crecemento economico di nos pais. Nos a pidi WEB e espacio aki. No pa gobierno so dicidi, pero tambe pa trece esaki den un Dialogo Social cu ta bay tuma lugar diabierna awor cu tur e datonan necesario”, Eman a duna di conoce.
Banda di esaki gobierno a pidi e accountant di WEB, PriceWaterhouseCoopers pa traha un analisis di cifranan cu si gobierno dicidi awe cu ta mantene e prijs na e nivel cu e ta, e prijs di fuel oil keda na e nivel cu e ta, cuanto e perdida lo ta cerca WEB. Ayeranochi 28 di juni, Minister di Uitilidad de Meza a haya e raport di PWC. E perdida pa e resto di e aña aki si no aumenta prijs di awa y coriente lo ta di 36.9 miyon. Un suma cu mester worde poni den perspectiva.
Prome Minister a bisa cu nan a keda masha sorprendi cu WEB, cu a worde informa via tur nivel cu gobierno kier e espacio necesario pa haci cierto ehercisionan, asina mes ta saca un declaracion cu nan a evalua aumento di prijs pa luna di juli. “Esaki pa nos ta inacceptabel” .
Eman a continua bisando cu esaki no tin aprobacion di gobierno. “No tin ningun aumento di awa y coriente ta tuma lugar na juli”, Eman den forma categorico a bisa. E proceso di aumento mester worde cana cu hopi respet pa nos ciudadanonan. Loke tabata sosode cu asina cu fuel oil tabata subi internacionalmente, cu masha facilidad ta pasa esaki over pa pueblo, ta algo cu ta pertence na pasado.
“No por ta asina cu sinta den un kamber sera, isola di realidadnan di e economia di Aruba, for di e realidadnan di e presupuesto familiar cu ta lucha pa sobrevivi, cada bes cu simplemente un calculator ta pasa e cuenta aki pa nos comunidad. No por papia di un compania di estado si den un forma comercial e decisionnan aki ta worde tuma”, Eman a bisa.

http://www.diario.aw

Los comentarios están cerrados.