(Aruba) Gobierno no a duna ningun OK ainda pa WEB subi tarifa

Aunke WEB ta purba na spanta pueblo…
ORANJESTAD (AAN): Varios hende a keda sorprendi cu e ‘revelacion’ di WEB Aruba NV riba Diamars atardi! Nan ta spanta pueblo, bisando cu e chens ta grandi cu Tarifa di Awa y Coriente lo “por” aumenta atrobe na Juli. Tur esey a worde haci, mientras cu ningun OK a worde duna door di Gobierno ainda entorno e aumento ey! WEB ta bisa, cu esaki tin di haber cu e aumento di prijs di fuel oil riba mercado internacional desde e ultimo calculacion di tarifa.
Pero esnan cu ta siguiendo noticia di Merca, por mira con combustible su tarifa ta bahando mas y mas. Algun hende hasta ta pronostica, cu otro luna, prijs di combustible na Aruba lo baha mas aun.
Na April WEB Aruba NV a comunica un aumento di tarifa di awa y coriente. Actualmente WEB ta haye atrobe ta evalua un aumento di tarifa. Desde e ultimo calculacion di tarifa e prijs di fuel oil riba mercado internacional a sigui aumenta. Pa e calculo di aumento di tarifa na April a haci uso di un prijs di fuel oil di US$ 93.00 pa bari.
WEB ta bisa, cu for di luna di april te cu awor e prijs di fuel oil a sigui subi y te hasta pa mayoria di e temporada aki tabata riba $100. Esaki a causa cu e costo real di produccion di awa y coriente tabata bastante mas halto cu locual lo por ser genera na entrada resultando den un perdida pa WEB. Si acaso esaki lo tabata pa un temporada cortico lo no ta problema y WEB lo por a aborba esaki. Pero mirando cu WEB ta den e situacion aki pa bastante tempo caba e compania no por sigui absorba e perdidanan aki mas.
Ta asina cu un di e requisitonan importante di e institucionnan financiero ta cu WEB mester mantene su mes financieramente sano. Pesey e maneho financiero di WEB ta un responsibilidad sumamente grandi y aunke un aumento di prijs na e momentonan aki no ta desea, e situacion financiero di WEB no ta permiti pa absorba mas.
WEB ta vigila e prijs di Fuel Oil diariamente pero mirando e situacion actual di WEB y e prijs di Fuel Oil riba mercado internacional e probabilidad ta grandi cu entrante dia 1 di juli tarifa di awa y coriente lo mester subi. Gerencia di WEB ta bon na altura cu aumento di tarifa di awa y coriente no ta un tema popular.
“Di otro banda gerencia ta responsabel pa e continuidad di e compania y e suministro di awa y coriente y no por djis keda absorba e extra gastonan aki mas. Ta pesey, gerencia di WEB kier a haci un apelacion fuerte na un y tur pa sea conciente y usa awa y coriente responsablemente pa preveni cu ta haya un cuenta halto den e lunanan venidero,” segun nan boletin.
DIARIO a tuma nota, cu pueblo no a keda hopi contento cu e revelacion aki di WEB Aruba NV. Es mas, den seno di Gobierno tampoco nan no a keda contento. Pasobra ta parce cu kier crea panico den un situacion ya caba dificil. Pa colmo esaki ta bin apenas un par di siman despues cu tabatin un manifestacion relaciona cu asunto di tarifa halto di awa y coriente riba e isla.
Kico pa haci anto? Ya caba tin hende cu ta keda cu cartera ‘bashi’ mey-mey di luna. Pues unico recurso ta pa hala faha mara aun mas, y spera cu por pasa trankil den e dificultad economico aki.
Mientras tanto, na Merca por nota cu e prijs di gasolin ta sigui baha tog y automobilistanan ta hayando alivio cu esaki.
Na Aruba mes, e prijs di Gasolin y Diesel actual pa chofernan lo keda valido ainda te cu dia 12 di Juli 2011. Pasobra ta te riba Diaranzon 13 di Juli 2011 (esta 14 dia mas pa bay) lo anuncia si acaso prijs di gasolin lo subi of baha.
WEB ta adverti, siendo cu Gobierno no a duna OK ainda. Pues tin chens cu e OK ey lo no bin tampoco, y na final ta WEB Aruba NV mes lo tin di bay absorba tur cos.

http://www.diario.aw

Los comentarios están cerrados.