(Aruba) Hospital lo tin mas espacio pa brinda mas cuido y servicio na pashentnan

Minister di Salubridad Publico y Deporte, dr. Richard Visser a tuma un decision historicoDespues di hopi aña porfin lo amplia Hospital
ORANJESTAD(AAN)–: “Mi vision ta pa pashentnan por gosa di mas servicio, di miho cuido y pa e personal di Hospital tin mas espacio pa por brinda esaki”, asina Dr. Richard Visser a duna di conoce na momento di anuncia e acuerdo cu lo firma dialuna cu SOGA. E minister encarga cu maneho di Salubridad Publico y Deporte ta consciente cu comunidad ta demanda mas cuido, ta conta riba mas servicio y cu mas facilidad na Hospital. E asunto aki di ampliacion di nos Hospital ta data for di hopi aña caba y no obstante hopi reunion, investigacion y negociacion, toch nunca Gobierno anterior no a logra finalisa e proyecto.
Minister Dr. Richard Visser a pone schouder bou di e proyecto, a adapta e plannan y a inclui su vision y maneho aden pa awo nos ta asina leu cu ta cla pa formalisa e plannan pa yega na financiamento, renobacion y ampliacion di e infrastructura existente.
Esaki lo no por tabata posibel sin e insistencia y determinacion di Minister Dr. Richard Visser, kende a tuma un decision historico pa amplia nos Hospital cu un hala mas na beneficio di nos pueblo y e generacionnan cu ta bin.
Dialuna awo Gobierno lo firma un MOU, un acuerdo di principio, cu Stichting Onroerend Goed Aruba (SOGA) pa mira con nan por keda encarga cu e financiamento, construccion y mantencion di e proyecto di ampliacion di Dr. Horacio Oduber Hospitaal, proyecta na mas di 150 miyon florin.
Di acuerdo cu e plannan riba mesa awo, Hospital lo haya mas espacio pa brinda mas y miho servicio na pashentnan. Ta obvio cu crecimento di nos poblacion, e cantidad di pashentnan cu nos unico Hospital ta mira anualmente tambe a bay ta aumentando.
Pero e facilidadnan no a crece durante e añanan, poniendo un presion enorme riba e poco espacio cu e personal tin disponibel pa por brinda servicio na pashentnan. Minister Dr. Richard Visser a revisa e plannan riba mesa y a pone masha enfasis riba e parti di Spoed Eisende Hulp, conoci den comunidad como “Poli”.
Ey ta caminda mayoria pashent ta yega diariamente pa ricibi atencion medico y hopi bes tin critica riba e tardansa pa ricibi atencion medico, riba e poco facilidadnan cu tin y riba e nivel di cuido.
Ta bon pa menciona cu na luna di januari ultimo a manda un carta pa directiva di Hospital, den cual Gobierno ta pidi nan atencion pa e nivel di cuido y servicio cu ta brindando na Spoed Eisende Hulp.
Minister Dr. Richard Visser ta convenci cu e hunta di directiva y e hunta di supervision mester percura pa cuminsa cu un trayecto urgente pa mehora e servicio eynan, unda cu mas pueblo ta reclama. “Mi vision ta pa por pone mas atencion na SEH pa nos por sigura cu pashentnan ta yega den bon man na momento cu mas nan tin mester di dje”, segun Minister Dr. Richard Visser.
E mandatario ta convenci cu e ampliacion di e infrastructura na Hospital lo brinda mas oportunidad pa yuda mas pashent na mes momento. Dentro di poco Minister di Salubridad Publico y Deporte lo anuncia su plannan concreto tambe na IMSAN, den cual lo alza e nivel di cuido, servicio y di posibilidadnan pa e pueblo di San Nicolas y pariba di brug. Aki ta pensando den yega na acuerdo cu un hospital mundialmente renombra, cu no solamente lo percura pa alza e nivel di cuido di Aruba, pero tambe lo sa di atrae turismo medico pa nos isla.
Den su vision, Minister Dr. Richard Visser ta boga pa pashentnan ta central den maneho di Hospital, cu nan por conta cu un nivel di cuido y servicio mucho mas halto.

http://www.diario.aw

Los comentarios están cerrados.