Mike Eman: Loke gobierno ta haciendo mester wordo multiplica den nos sociedad

ORANJESTAD(AAN):–Gobierno actualmente ta haciendo masha hopi inversion den infrastructura y renobacion di nos isla. Hopi placa ta wordo inverti e momentonan aki.
Diabierna gobierno a invita e asociacion di banconan y tambe asociacion di seguronan pa un reunion. Kier a papia riba diferente cos. Entrenan busca manera pa haci fianzanan mas atractivo pa sector priva tambe inverti. Den un entrevista cu prome minister Mike Eman el a splica cu nan tin e perspectivanan cu ta wordo fortifica y confirma. Esfuerzonan cu gobierno a haci na 2010 ta hayando su frutonan den 2011.

Por a mira e cifranan na 2009 ora cu gobierno a sinta un caida den economia di 10% y tambe turismo cu casi 10%. E relacionnan tambe tabata hopi malo cu partnernan strategico manera reino Hulandes, KLM y Carnival Cruises entre otro. E relacion no tabata duna e confianza y pone e ritmo pa un progreso di nos pais.
Gobierno a pone hopi trabao y hopi esfuerzo a wordo haci y ta mira caba e resultadonan concreto cu e reapertura di Valero y crecimento den turismo cu construccionnan tambe cu a cuminsa e momentonan aki den centro di ciudad y barionan cu tambe ta bai inicia.
Prome minister Mike Eman a splica cu gobierno a bin comparti cu banconan y institutonan financiero manera seguronan grandi na Aruba e pensamento cu e fasenan aki cu ta wordo carga dor di gobierno, no por keda na gobierno so.
Gobierno no por haya e maximo potencial di progreso pero mester comparti esaki tambe mas ampliamente cu comunidad, empresarionan di nos pais probechando di e oportunidadnan cu gobierno ta creando.
Gobierno ta sinti cu si banconan y institutonan financiero duna di nan parti pa loke ta trata interes y sosten na empresanan nobo cu kier inicia of esnan existente lo ta un estimulo pa e desaroyo y inversion cana hunto cu esun di gobierno.
Prome minister Mike Eman ta kere den e esfuerzonan conhunto. Gobierno no ta kere cu ta banconan so mester tin e responsabilidad y resolve e problema. Mester haci mihor uso di e oportunidadnan di crecimento y esaki mester wordo haci hunto.
Diabierna tabata e dia cu gobierno a sinta cu e institutonan financiero y e banconan pa kita tur obstaculo cu tin pa empresarionan existente y nobo yega na acceso pa capital y por wordo encurasha pa por traha nan ideanan empresarial pa futuro.
Hunto den e caso aki gobierno y e institutonan financiero mester sostene e empresarionan aki pa e exito cu tin e momentonan aki.
Locual gobierno ta haciendo mester por wordo multiplica den nos sociedad tambe e prome minister di Aruba a finaliza bisando.

http://www.diario.aw

Los comentarios están cerrados.