Retraso den proyectonan na San Nicolas a keda soluciona

ORANJESTAD (AAN) – DIARIO a acerca Prome Minister mr. Mike Eman, relaciona cu e proyectonan cu tin pa desaroya den e distrito di San Nicolas, entre otro e renovacion di watertoren, cu tin tardanza. E dignatario a señala cu e tardanza ta debi cu ora nan a termina cu e parti di Arkitectura, a descubri cu e construccion di e watertoren di San Nicolas, contrario na esun di Playa, su beton tabata hopi afecta, locual por ta debi na salpeter of e bientonan cu ta bin di e refineria.
E situacion aki a haci cu mester a midi, pa wak si na momento di bin cu e destaho publico, mester pidi e contratista pa haci algo adicional pa reforza e structura, y esaki a causa cierto tardanza pero aworaki por mira cu e cambionan ta bayendo den bon direccion.
Tocante Yiwana Morto y De Vuyst tambe tabata tin un retraso cu ayera a keda soluciona, y tur documento a bay pa Fondo Desaroyo Aruba (FDA), y un bez cu e destaho publico wordo publica, e contristanan ta haya un luna pa duna nan prijs y un par di siman despues cu e ganador ta wordo saca, e tres proyectonan: Yiwana Morto, De Vuyst y Madiki cu tambe ta forma parti di e desaroyo aki, ta cuminza.
Prome Minister a subraya cu naturalmente gobierno ta pusha tur dia pa nan inicia, pasobra e hendenan ta ansioso pa mehora e calidad di bida di nan bario, pero tambe den sentido cu e ta trece un actividad economico aden, ya cu e ta genera trabao, y esey ta pone cu tin extra interes pa e proyectonan aki cuminza.
“ Tambe e ta trece oportunidad pa contratistanan mas chikito, ya cu hopi biaha pa proyectonan grandi ta contratistanan grandi so, cu por para garantia pa e rekisitonan cu ta wordo exigi, ta gana e destaho, pero pa proyectonan chikito manera den e barionan, contratistanan chikito tambe por haya oportunidad pa participa y asina por parti e beneficionan den mas tanto compania y trahador posible”, Premier Eman a subraya.

http://www.diario.aw

Los comentarios están cerrados.